KTR Meeting with Maharashtra Representatives : 'బుల్లెట్ ట్రైన్ కన్నా వేగంగా తెలంగాణ అభివృద్ధి చెందుతోంది'

KTR Meeting with Maharashtra Representatives of Real Estate : తెలంగాణ రాష్ట్ర అభివృద్ధి యావత్ దేశం దృష్టిని ఆకర్షిస్తోంది. స్వరాష్ట్రం సాధించిన తర్వాత సీఎం కేసీఆర్ అవలంభిస్తోన్న సానుకూల విధానాల నేపథ్యంలో రాష్ట్రం అన్ని రంగాల్లో అభివృద్ధి పథంలో దూసుకుపోతోంది. అభివృద్ధి, ప్రభుత్వ విధానాలపై పలు రాష్ట్రాలు అధ్యయనం చేస్తున్నాయి. తాజాగా మహారాష్ట్ర నుంచి స్థిరాస్తి రంగ సంస్థల ప్రతినిధుల బృందం హైదరాబాద్ విచ్చేసింది. మూడు రోజుల పర్యటనలో భాగంగా టీ-హబ్‌లో 250 మంది ఆయా సంస్థల ప్రతినిధులతో ఐటీ, పురపాలక శాఖ మంత్రి కేటీఆర్‌ ప్రత్యేకంగా సమావేశమయ్యారు.

KTR Meeting with Maharashtra Representatives of Real Estate : తెలంగాణ అభివృద్ధి గురించి తెలుసుకోవడానికి నగరానికి విచ్చేసిన మహారాష్ట్ర ప్రతినిధులకు ఐటీ శాఖ మంత్రి కేటీఆర్​ స్వాగతం పలికారు. ఈ సందర్భంగా పలు అంశాలపై సుధీర్ఘంగా చర్చించారు. తెలంగాణ రాష్ట్ర సమగ్రాభివృద్ధి, ప్రత్యేకించి హైదరాబాద్ మహానగరం ప్రగతిపై మంత్రి పవర్ పాయింట్ ప్రజెంటేషన్ ఇచ్చారు. విద్యార్థిగా పుణేలో చదివిన రోజుల నుంచి మహారాష్ట్రతో తనకు అనుబంధం ఉందని ప్రస్తావించారు. మహారాష్ట్రలో అనేక జిల్లాలు చారిత్రాత్మకంగా రాష్ట్రంతో అనుబంధం కలిగి ఉన్నాయని పేర్కొన్నారు. ఇవి గతంలో హైదరాబాద్ రాష్ట్రంలో భాగంగా ఉన్నాయని వివరించారు. అందుకే తెలంగాణ-మహారాష్ట్ర మధ్య సాంస్కృతిక, మానవ సంబంధాలు బలంగా ఉన్నాయని గుర్తు చేశారు.

KTR Powerpoint Presentation on Telangana Development : రాష్ట్రం ఏర్పడినప్పుడు అనేక అనుమానాలు పటాపంచలు చేస్తూ 10 సంవత్సరాలుగా అభివృద్ధి పథంలో ముందుకు పోతున్నామని స్పష్టం చేశారు. ఎంత ఎక్కువ నిధులు మౌలిక వసతుల కల్పనపై వెచ్చిస్తే అంత వేగంగా అభివృద్ధి సాధ్యం అవుతుందని.. హైదరాబాద్ నగర అభివృద్ధి కోసం బహుముఖ వ్యూహంతో రాష్ట్ర ప్రభుత్వం పని చేసిందని చెప్పుకొచ్చారు. హైదరాబాద్ నగరంలో ఐటీ, ఐటీ అనుబంధ రంగాలతో పాటు లైఫ్ సైన్సెస్ బయోటెక్నాలజీ రంగం(Life Sciences Biotechnology Field)లోనూ భారీ ఎత్తున పెట్టుబడులు ఆకర్షించేలా అవసరమైన మౌలిక వసతుల కల్పనను చేపట్టామని వెల్లడించారు. భాగ్యనగరం చరిత్రలో ఎప్పుడు లేని విధంగా బెంగళూరు నగరాన్ని ఐటీ ఉద్యోగాల కల్పనలో వరుసగా రెండు సంవత్సరాలు దాటివేసిందని కీర్తించారు.

Telangana First Place in Grain production : ఐటీ ఎగుమతులతో పాటు ధాన్యం ఉత్పత్తిలో రాష్ట్రం అగ్రస్థానంలో ఉందని స్పష్టం చేశారు. తెలంగాణ రాష్ట్రం మౌలిక వసతులతో పాటు పరిపాలన సంస్కరణలపై ప్రధానంగా దృష్టి సారించిందని, అందుకే దేశంలో ఎక్కడా లేనిరీతిలో విప్లవాత్మక టీఎస్ ఐపాస్, భవన నిర్మాణాల అనుమతుల కోసం టీఎస్​బీ పాస్ ప్రవేశపెట్టిందన్నారు. ఇప్పటికే తెలంగాణ విధానాలు, పథకాలను అనేక రాష్ట్రాలు వచ్చి అధ్యయనం చేసి వెళ్లాయని తెలిపారు. నగరంలో భారీ ఎత్తున మౌలిక వసతుల కల్పన చేపట్టి భవిష్యత్తు విస్తరణకు అనుగుణంగా ప్రజా రవాణా వ్యవస్థను తీర్చిదిద్దే ప్రయత్నాలను ప్రభుత్వం చేస్తోందని కేటీఆర్ పవర్‌ పాయింట్ ప్రజెంటేషన్‌లో వివరించారు. నగరంలో 415 కిలోమీటర్ల మేర మెట్రో రైల్(Metro Rail) వ్యవస్థ ఏర్పాటుకు ప్రణాళికలు సిద్ధం చేస్తున్నారని తెలిపారు. ఎస్‌ఆర్‌డీపీ ఆధ్వర్యంలో ఇప్పటికే భారీ ఎత్తున నిధులు ఖర్చు చేసి అనేక ఫ్లై ఓవర్లు, అండర్ పాసులు, బ్రిడ్జి లాంటి నిర్మాణాలను పూర్తి చేశారని చెప్పారు.

Real Estate Representatives Reaction on Telangana Development : భవిష్యత్తు అవసరాలకు అవసరమైన విద్యుత్, తాగు నీటి సరఫరా వ్యవస్థలను సిద్ధం చేసి ఉంచబోతున్నాం అని వెల్లడించారు. 100 శాతం మురుగు నీటిని శుద్ధి చేసే తొలి నగరంగా మారబోతున్నారని ఆశాభావం వ్యక్తం చేశారు. దేశంలో ముంబయి నగరం తర్వాత ఎత్తైన భవనాలు కలిగిన నగరంగా హైదరాబాద్ స్థానం సంపాదించుకుందని చెప్పుకొచ్చారు. వినూత్నమైన టీడీఆర్ విధానం ద్వారా సుమారు రూ.5 వేల కోట్లు పైగా ప్రజాధనం జీహెచ్‌ఎంసీ పొదుపు చేయగలిగిందని తెలిపారు. దేశంలోనే అతిపెద్ద మురికివాడల అభివృద్ధి కార్యక్రమాలు చేపట్టి.. వారికి పక్కా ఇల్లు నిర్మించి ఉచితంగా అందజేశారని చెప్పారు. ప్రతి పట్టణ, స్థానిక సంస్థల బడ్జెట్‌లో 10 శాతం గ్రీన్ బడ్జెట్ ఏర్పాటు చేసిన దృష్ట్యా పల్లెల్లన్నీ పచ్చటి వనాలుగా మారుతున్నాయని మంత్రి విశ్లేషించారు. వివిధ అంశాలపై సుధీర్ఘంగా సాగిన కేటీఆర్ పవర్ పాయింట్ ప్రజెంటేషన్ అనంతరం.. మహారాష్ట్ర ప్రతినిధి బృందం హర్షం వ్యక్తం చేసింది. బుల్లెట్ ట్రైన్ కన్నా వేగంగా తెలంగాణ అభివృద్ధి చెందుతుందంటూ కితాబు ఇచ్చింది.