ప్రధాని మోదీ, కేంద్ర హోం శాఖ మంత్రి అమిత్‌షా, జల్శక్తి మంత్రి గజేంద్రసింగ్ షెకావత్‌లను కలిసిన తర్వాతే సీఎం కేసీఆర్ హైదరాబాద్ వెళ్లనున్నట్లు సమాచారం. ఈ ముగ్గురు అపాయింట్‌మెంట్లను సీఎంవో ఇప్పటికే కోరింది. వీలైతే ప్రధానమంత్రి, జల్శక్తి మంత్రులను శుక్రవారమే కలిసే అవకాశం ఉంది. ఆ తర్వాత అమిత్‌ షాను కలుస్తారని తెలిసింది. ముగ్గురిని కలిసిన అనంతరం ఆదివారం ముఖ్యమంత్రి దిల్లీ నుంచి హైదరాబాద్కు తిరుగుపయనమవుతారని పార్టీ వర్గాల సమాచారం.
నిపుణులతో కేసీఆర్ భేటీ
కృష్ణా, గోదావరి బోర్డుల పరిధిపై జారీ చేసిన గెజిట్, వివిధ ప్రాజెక్టులకు సంబంధించిన అంశాలపై జల్శక్తి మంత్రి గజేంద్రసింగ్ షెకావత్తో చర్చించేందుకు ముందస్తుగా పలువురు నిపుణులు, అధికారులతో సీఎం గురువారం రాత్రి తన నివాసంలో సమావేశమయ్యారు. ఆయా అంశాలపై రాష్ట్ర ప్రభుత్వ వాదనలు మంత్రి వద్ద బలంగా వినిపించాలని సమావేశంలో చర్చించినట్లు తెలిసింది.
ఇదీ చదవండి: KTR: ఐటీఐఆర్ పథకాన్ని పునరుద్ధరించండి.. కేంద్రమంత్రికి కేటీఆర్ విజ్ఞప్తి
