KA Paul Was Angry With KCR: తెలంగాణ కొత్త సచివాలయం ప్రారంభోత్సవం ఏప్రిల్ 14న అంబేడ్కర్ పుట్టిన రోజున చేయాలని ప్రజా శాంతి పార్టీ అధ్యక్షుడు కేఏ పాల్ డిమాండ్ చేశారు. సీఎం కేసీఆర్, బీఆర్ఎస్ పార్టీపై ధ్వజమెత్తారు. హైదరాబాద్లోని అమీర్పేట్లో జరిగిన సమావేశంలో ఆయన మాట్లాడారు. రాష్ట్రంలో సీఎం కేసీఆర్ రాక్షస పాలన సాగుతోందని కేఏ పాల్ మండిపడ్డారు. దళితుల ఓట్లు సంపాదించేందుకే సీఎం కేసీఆర్ 125 అడుగుల అంబేడ్కర్ విగ్రహాన్ని నిర్మిస్తున్నారని ఆరోపించారు.
సచివాలయాన్ని డాక్టర్ బీఆర్ అంబేడ్కర్ పుట్టినరోజు మాత్రమే ప్రారంభించాలని డిమాండ్ చేశారు. అంబేడ్కర్ పేరు పెట్టి నూతన సచివాలయాన్ని కేసీఆర్ పుట్టినరోజు నాడు ఎలా ప్రారంభిస్తారని ప్రశ్నించారు. కేసీఆర్ పుట్టిన రోజునే ప్రారంభిస్తే.. సచివాలయానికి కేసీఆర్ భవన్ అని పేరు పెట్టవచ్చు కదా అని తెలిపారు. సీఎం కేసీఆర్ తనను తాను జాతిపిత అని చెప్పుకుంటూ తన పుట్టినరోజున ప్రారంభించాలని చూస్తున్నారని మండిపడ్డారు. ఎట్టి పరిస్థితుల్లో అయినా అంబేడ్కర్ పుట్టినరోజునే సచివాలయాన్ని ప్రారంభించాలని తీర్మానించారు.
రాష్ట్రం రూ.5 లక్షల కోట్లు అప్పుల ఊబిలో ఉంటే సీఎం కేసీఆర్ నూతన సచివాలయం నిర్మించారని దుయ్యబట్టారు. ఫిబ్రవరి17నే సచివాలయం ప్రారంభిస్తే అంబేడ్కర్ అనుచరులు సచివాలయ ముట్టడికి పూనుకోవాలని పిలుపునిచ్చారు. హైకోర్టు ఎన్ని మొట్టికాయలు వేసిన ఈ ప్రభుత్వం తీరు మారదని ఘాటుగా విమర్శించారు. తాను హైకోర్టులో పిటిషన్ వేయడం వల్లే కామారెడ్డి మాస్టర్ ప్లాన్ రద్దయ్యిందని ఈ సందర్భంగా తెలిపారు. దళితుడిని సీఎం చేస్తానన్న సీఎం మాట తప్పారని కేఏ పాల్ అన్నారు. యువతకు ఉద్యోగాలు కల్పిస్తామని హామీ ఇచ్చారని.. ఆ హామీ ఏమైపోయిందని ప్రశ్నించారు.
"అంబేడ్కర్ పుట్టినరోజు ఏప్రిల్ 14న నూతన సచివాలయం ప్రారంభించాలి. అంబేడ్కర్ను హీనపరిచి మీరు మీ పుట్టినరోజు(కేసీఆర్)న ఫిబ్రవరి17న ఇంకా పూర్తికానీ సచివాలయాన్ని ఎందుకు ప్రారంభిస్తున్నారు చెప్పాలి. ఇంకా డైరెక్టుగా కేసీఆర్ భవన్ అని పెట్టుకోవచ్చు కదా? మీరు దళితుల్ని సీఎంలు చేస్తానన్నారు. మాట తప్పారు. రైతులు మీద దాడులు ఆపండి అని నిన్ననే హైకోర్టులో మొట్టికాయలు పడ్డాయి. ఫిబ్రవరి17నే సచివాలయం ప్రారంభిస్తే అంబేడ్కర్ అనుచరులు సచివాలయ ముట్టడికి పూనుకోవాలి." - కేఏ పాల్, ప్రజాశాంతి పార్టీ అధ్యక్షుడు
ఇవీ చదవండి:
