ECLAT Jobs in Hyderabad: అమెరికాకు చెందిన ప్రసిద్ధ వైద్య సాంకేతిక సేవల సంస్థ ఎక్లాట్ హెల్త్ సొల్యూషన్స్ వరంగల్, ఖమ్మంలలో కొత్తగా పంపిణీ కేంద్రాలను స్థాపించనుంది. ఇప్పటికే హైదరాబాద్, కరీంనగర్‌లలో ఉన్న క్యాప్టివ్‌ కేంద్రాలను విస్తరించనుంది. వీటి ద్వారా మొత్తం 1,400 మందికి కొత్తగా ఉపాధి లభిస్తుంది. సంస్థ సీఈవో కార్తీక్‌ పొల్సాని, ముఖ్య నిర్వహణ అధికారి స్నేహల నేతృత్వంలోని ప్రతినిధి బృందం గురువారం ప్రగతిభవన్‌లో పరిశ్రమలు, ఐటీ శాఖల మంత్రి కేటీ రామారావును కలిసింది. తమ ప్రతిపాదనలను వివరించింది. 2016లో ప్రభుత్వంతో ఒప్పందం చేసుకున్న సంస్థ కరీంనగర్‌లో 200 మందితో కూడిన క్యాప్టివ్‌ కేంద్రాన్ని ఏర్పాటు చేసింది. తర్వాత హైదరాబాద్‌లో 300 మందితో మరొకటి స్థాపించింది. తాజా ప్రతిపాదనల ప్రకారం కొత్తగా హైదరాబాద్‌లో 500, కరీంనగర్‌లో 300 మందికి ఉపాధి కల్పించనున్నారు. వరంగల్, ఖమ్మంలలో ఏర్పాటు చేసే కేంద్రాల్లో మూడేసి వందల మందికి ఉపాధి లభిస్తుంది. భవిష్యత్తులో తమ కేంద్రాలను మరింత పెంచుతామని తెలిపింది. తెలంగాణ ప్రగతికి సహకరిస్తామని కార్తీక్‌, స్నేహ చెప్పారు. కేటీఆర్‌ ఎక్లాట్ ప్రతినిధులను అభినందించారు.
ద్వితీయ శ్రేణి నగరాలకు మరింత ఊతం: కేటీఆర్‌
‘‘తెలంగాణ ప్రభుత్వం అభివృద్ధి వికేంద్రీకరణలో భాగంగా ద్వితీయ శ్రేణి నగరాల్లో ఐటీ ఆధారిత సంస్థలు, ఉపాధి కల్పనకు దృష్టి సారిస్తోంది. ఎక్లాట్ వంటి ప్రసిద్ధ సంస్థలు దీనికి మద్దతునిస్తున్నాయి. రోగుల సమాచారం నమోదు, ప్రమాద నివారణ చర్యల అమలు తదితర అంశాలకు ఎక్లాట్ సహకరిస్తోంది. వైద్యరంగంలో సాంకేతికతకు ఉన్న డిమాండు దృష్యా దానికి ఆదరణ లభిస్తోంది. తెలంగాణలో ఆ సంస్థ విస్తరణకు అన్ని విధాలా సహకరిస్తాం’’ అని మంత్రి కేటీఆర్‌ తెలిపారు.
ఇదీ చూడండి: Apex Council Meet: త్వరలో అపెక్స్ కౌన్సిల్ భేటీ.. తెలుగు రాష్ట్రాలకు సమాచారం
