Innovative Expo in Vignan College : 'ఇన్నోవేట్ టు ఇన్‌స్పైర్'.. విజ్ఞాన్​ కాలేజ్​లో ఇన్నోవేటివ్ ఎక్స్‌పో-2023

Innovative Expo in Vignan College : హైదరాబాద్ విజ్ఞాన్ కాలేజ్​లో విద్యార్థుల్లోని నైపుణ్యాలను వెలికితీసేందుకు 'ఇన్నోవేట్ టు ఇన్‌స్పైర్' నినాదంతో ఇన్నోవేటివ్ ఎక్స్​పో-2023ను నిర్వహించారు. ఈ ఎక్స్​పోలో విద్యార్థులు రూపొందించిన దాదాపు 386 ప్రాజెక్టులను ప్రదర్శించారు. వీటిని చూసేందుకు నగరం నలుమూలల నుంచి వివిధ కళాశాలల విద్యార్థులు వచ్చారు.

Innovative Expo in Vignan College : నేటి యువతలోని సృజనాత్మకతను వెలికితీసి వారికి అవకాశాలు కల్పించేందుకు ఎన్నో వేదికలున్నాయి. వాటి సాయంతో యువత అద్భుత ఆవిష్కరణలు చేస్తున్నారు. అలాంటి ఆవిష్కరణల కోసం.. యువతలోని నైపుణ్యాన్ని బయటకు తీసి వారికి తోడ్పాటును అందించడానికి హైదరాబాద్​లోని విజ్ఞాన్ ఇన్​స్టిట్యూట్ ఆఫ్ టెక్నాలజీ అండ్ సైన్సెస్​లో ఓ కార్యక్రమాన్ని నిర్వహించారు. విజ్ఞాన్ ఇన్నోవేటివ్ ఎక్స్​పో-2023 పేరుతో నిర్వహించిన ఈ కార్యక్రమంలో కంప్యూటర్ సైన్స్, దాని అనుబంధ శాఖలు, సివిల్, మెకానికల్, ఎలక్ట్రానిక్స్, ఎలక్ట్రికల్ బ్రాంచ్​ల నుంచి విద్యార్థులు పాల్గొన్నారు.

Tech Fest in Vignan College Hyderabad : ఈ విద్యార్థులంతా తమలోని నైపుణ్యాన్ని ఈ ఎక్స్​పోలో ప్రదర్శించారు. వివిధ రకాల ఆవిష్కరణలను ఈ ప్రదర్శనలో చూపించారు. ఈ కార్యక్రమంలో మొత్తం 386 ప్రాజెక్టులు ప్రదర్శించగా.. అందులో చాలా వరకు సామాజిక అంశాలకు సంబంధించినవే ఉండటం గమనార్హం. ఈ టెక్ ఫెయిర్ చూడటానికి వివిధ కళాశాలల నుంచి విద్యార్థులు భారీగా వచ్చారు. విజ్ఞాన్ విద్యార్థులు, అధ్యాపకులు.. సందర్శకులకు తమ ప్రాజెక్టుల వివరాలు వివరించారు.

ఈ ఎక్స్​పోలో ఓ ప్రాజెక్టు మాత్రం అందరి దృష్టిని ఆకర్షించింది. అదేంటంటే.. నేచురల్ లాంగ్వేజ్​ను ఉపయోగించి విద్యార్థుల ఆత్మహత్యలను నిరోధించాలే లక్ష్యంగా ఓ వ్యవస్థను అభివృద్ధి చేశారు కొందరు విద్యార్థులు. లావణ్య కుమారి ఆధ్వర్యంలో డేటా సైన్స్ డిపార్ట్​మెంట్​కు చెందిన మిహిర్ కుమార్ రాయ్ (20), ఎండి అమానుల్లా (19), జి సిద్ధార్థ (19), వి నిహారిక (19) డెవలప్ చేసిన ఈ ఆవిష్కరణ సందర్శకుల మనసు గెలుచుకుంది.