ఒకప్పటి వరంగల్ జిల్లా కేశవాపూర్లోని ఓ నిరుపేద కుటుంబంలో జన్మించారు బుర్రా వెంకటేశం. పసితనంలో తండ్రిని కోల్పోయినా ... తల్లి కష్టార్జితంతో కష్టపడి చదువుకున్నారు. 1992లో ఉస్మానియా యూనివర్శిటీ నుంచి లా పట్టా పొందారు. సమాజానికి సేవ చేయాలనే లక్ష్యంతో సివిల్స్వైపు అడుగులేశారు. నిరంతరం శ్రమించి 1995లో సివిల్స్ ర్యాంకు సాధించారు. ఉమ్మడి ఆంధ్రప్రదేశ్లో గుంటూరు, మెదక్ జిల్లాల్లో పనిచేశారు. అదే సమయంలో మానసిక సమస్యలతో బాధపడుతున్న వారికి అండగా నిలిచారు. సుమారు 2 వేల మందికి పునరావాసాన్ని కల్పించారు. ఆయన చేసిన పలు సామాజిక కార్యక్రమాలకు... రెడ్ క్రాస్ బంగారు పతకాలతో పాటు పలు అవార్డులను సైతం సొంతం చేసుకున్నారు.
విజయానికి... సెల్ఫీ ఆఫ్ సక్సెస్
బుర్రా వెంకటేశం ప్రస్తుతం తెలంగాణ రాష్ట్రంలో సాంస్కృతిక శాఖ ముఖ్య కార్యదర్శిగా పనిచేస్తున్నారు. మొదటి నుంచి పుస్తకాలంటే మక్కువ పెంచుకున్న ఆయన... తెలుగు, ఆంగ్ల సాహిత్యాలను, అబ్దుల్ కలాం రాసిన పుస్తకాలను ఆసక్తిగా చదివారు. ఆ స్ఫూర్తితోనే 'సెల్ఫీ ఆఫ్ సక్సెస్' పుస్తకాన్ని రచించారు. జీవితంలో ఒడుదొడుకులు ఎదుర్కొని... విజయం దిశగా అడుగులేసిన వారి జీవిత గాథలను ఈ పుస్తకంలో పొందుపరిచారు. అమెజాన్లో విడుదల చేసిన ఈ పుస్తకం న్యూరైటర్స్ విభాగంలో మొదటి స్థానాన్ని సంపాదించుకుంది. అంతే కాకుండా... పదేళ్లుగా రికార్డులను సొంత చేసుకున్న వారి పలువురి పుస్తకాలను తోసిరాజని ముందుకు దూసుకుపోతోంది.
శ్రమించే తత్వమే విజయానికి మార్గం
నిరంతరం శ్రమించే తత్వమే విజయానికి మార్గమని బుర్రా వెంకటేశం చెబుతారు. విజయం ఏ ఒక్కరి సొత్తు కాదని... తాము ఎంచుకున్న రంగంలో ఏకాగ్రతతో కృషి చేస్తే ఎవరైనా ఉన్నత శిఖరాలు అధిరోహించవచ్చని సూచిస్తున్నారు.
ఓ కుగ్రామంలో మొదలైన తన జీవితంలో ఎన్నో ఒడుదొడుకులను ఎదుర్కొన్నప్పటికీ ఎప్పుడూ చెదరని చిరునవ్వు, ఆత్మవిశ్వాసమే ఆభరణాలుగా ముందుకు సాగుతున్నారు ఈ ఐఏఎస్ అధికారి. సమస్యల్లో ఉన్న వారికి నిత్యం అండగా ఉంటూ ముందుకు సాగుతున్న బుర్రా వెంకటేశం జీవితం ఎందరికో ఆదర్శనీయం.
ఇదీ చూడండి : నేలకు రంధ్రాలు చేశాడు.. భూగర్భ జలాలు పెంచాడు!
