హోలీ ఎందుకు జరుపుకుంటారో మీకు తెలుసా..?

పుడమి నిద్రపోతున్న వేళ... ఫాల్గుణ పౌర్ణమి వెన్నెల్లో పచ్చిక బయళ్ల మీద ప్రకృతి సమావేశమైంది. ఇంద్రధనస్సు అధ్యక్షతన జరిగిన సమావేశానికి పిల్ల గాలులు, కారు మబ్బులు, లతలూ, తుమ్మెదలు, సకల జీవరాశులు హాజరయ్యాయి. వాటి సమావేశానికో కారణం ఉంది. ఆ పూర్ణిమకో విశిష్టత ఉంది. ఆరోజు ప్రత్యేకత ఏంటి.. వాటి సమావేశంలో చర్చకొచ్చిన అంశాలు ఏంటనేది మనమూ ఓ లుక్కేద్దాం.

పిండారబోస్తున్నట్లు కాస్తున్న పౌర్ణమి వెన్నెల కాంతుల్లో జరుగుతున్న సమావేశంలో ముందుగా ఇంద్ర ధనస్సు లేచి సభ్యులందరికీ నమస్కరించి.. ఇలా చెప్పుకొచ్చింది. ఈ రోజు పాల్గుణ పౌర్ణమి.. దీనినే డోలికా పూర్ణిమ అని... హోలికా పూర్ణిమ అని అంటారని చెప్పింది. ఇంతలో ఓ తుమ్మెద లేచి... ఓ అవునా అయితే ఇవాళ హోలీ పండుగ అన్నమాట.. అసలు ఈ పండుగ ఎలా వచ్చింది.. ఎలా చేసుకోవాలని అడగగా.. ఇంద్ర ధనస్సు ఇలా వివరించింది. రాధాహృదయాధిపతి అయిన చిన్ని కృష్ణుడిని ఊయలలో వేసిన రోజుగా బంగాల్​లో డోలికోత్సవాన్ని చేసుకుంటారు. ఈ పౌర్ణమితో పాల్గుణమాసం ముగిసి వసంత మాసం ప్రారంభమవుతుంది. ఆ రోజునే వసంతోత్సవం పేరుతో రంగులు చల్లుకుంటారు. భారతదేశంలో పాల్గుణ పౌర్ణమనినాడు హోలీ పండుగ జరుపుకుంటారని చెప్పింది.

ఇంతలో సభలో ఉన్న కోకిల లేచి ఓ అవునా.. ఈ వేడుకంటే నాకు చాలా ఇష్టం.. గతేడాది వేరే దేశానికి వలస వెళ్లినప్పుడు అక్కడ కూడా చేసుకున్నారు. మన పొరుగున ఉన్న నేపాల్​, బంగ్లాదేశ్​లో రంగులమయంగా జరుపుకున్నారు. హోలీ అంటే అగ్ని అని అర్థమంట... అని ముగించింది. పక్కనే కారుమబ్బు ఆ ప్రసంగాన్ని కొనసాగిస్తూ అవునవును హిరణ్యకశ్యపుని సోదరి అయిన హోలిక అంతమైన రోజున ఈ వేడుకను జరుపుకుంటారు. ప్రహ్లాదుడుని మంటల్లో వేయబోయి తానే దహనమైందని పురాణాల్లో ఉంది. అందుకే చాలా ప్రాంతాల్లో హోలికను దహనం చేస్తుంటారు. గతేడాది నుంచి ప్రజల ప్రాణాలు హరిస్తున్న కరోనాసురుడుని తగలబెడుతున్నారని తాను చూసినదాన్ని కోకిల వివరించింది.

ప్రసంగాన్ని ఉత్సాహంగా వింటున్న ఓ పాము లేచి తనకు తెలిసిన కథను ఇలా చెప్పింది. మా నాగవంశం పెద్దలు హోలీ వేడుక గురించి ఓ కథ చెప్పారు. అదేమిటంటే.. పరమేశ్వరుడికి హిమవంతుని కుమార్తె అయిన పార్వతీదేవిపై దృష్టి మరల్చేలా మన్మథుడు నీలికంఠుడిపై పూలబాణం సంధిస్తాడు. తపోభంగం కలిగిన శివుడు ఉగ్రరూపుడై మన్మథుడుని భస్మంచేశాడని.. అలా కోరికలు దహింపచేసిన రోజును హోలీగా చేసుకుంటారని చెప్పింది. అందుకే ఆరోజున మన్మథుడి బొమ్మకు నిప్పంటిస్తారంట..

కొమ్మలపై కులసాగ కూర్చున్న నెమలి సభలోకొచ్చి ఎన్ని కథలున్నా మానవాళి ఘనంగా చేసుకునే పండుగ హోలీ. దీనికి శాస్త్రీయ కారణాలు కూడా ఉన్నాయి. ఇన్నాళ్లు చలితో వణికిన నరులు.. ఒక్కసారిగా వేడెక్కిన వాతావరణం వల్ల రకరకాల వ్యాధులు వస్తాయి. అందుచేతనే ఔషధాల నుంచి తయారు చేసిన రంగులను చల్లుకోవడం వల్ల వ్యాధులు తగ్గుతాయనే వాదనను కొట్టిపారేయలేం అని చెప్పి తిరిగి కొమ్మపైకెళ్లిపోయింది.

పచ్చికబయళ్ల పక్కన జోరుగా సాగుతున్న వాగు కలుగజేసుకుని అవునవును హోలీ చిన్నా పెద్దా.. తేడా లేకుండా రంగురంగుల వర్ణాలను చల్లుకుంటూ సంతోషంతో మునిగి తేలేవారు. కానీ రానురాను విషరసాయనాలతో చేసిన రంగులు చల్లుకుంటూ నన్ను కలుషితం చేయడమే కాకుండా మానవులు రోగాలపాలవుతున్నారు. అంతేకాకుండా.. రంగులు చల్లుకున్న తర్వాత స్నానానికి దిగి ఈతరాక ప్రాణాలు విడుస్తున్న వారిని చూస్తుంటే మనసు చివుక్కుమంటుంది. ఆయా విషయాల్లో మానవులు జాగ్రత్తలు తీసుకోవాలని చెప్పి తనదారిన తాను చక్కాపోయింది.

సభలో తీరుబడిగా కుర్చున్న గోరింక ఏదో గుర్తొచ్చిన దానిలా ఠక్కున లేచి... రంగులు జల్లుకుంటూ ఉల్లాసంగా గడిపిన మాట అటుంచితే.. మహమ్మారి కరోనా కోరలు చాస్తున్న సమయంలో బయటకు రాకపోవడమే నయం. లాక్​డౌన్​ ప్రభావం.. కొవిడ్​ మృత్యుహేలి ఏడాది నుంచి చూస్తూ ఇప్పుడిప్పుడే కోలుకుంటున్నారు మానవులు. వేడుకంటే నలుగురు కలిసి జరుపుకునేదే అయినా.. రేపటిరోజు సంతోషంగా ఉండాలంటే ఈసారికి గడపదాటకపోవడమే నయం.

అయినా చెడుపై మంచి సాధించిన దానికి గుర్తుగా జరుపుకునే హోలీ వేడుకకు గుర్తుగా మనిషిలోని క్రోధం, అసూయలాంటి దుర్గుణాలను విడిచిపెట్టేయడమే ఓ పండుగకదా అని చెప్పింది. గోరింక వ్యాఖ్యలు విన్న సభికులు చప్పట్లు కొట్టారు. ఇంతలో తెల్లారుతుండడం వల్ల ఏడుగుర్రాల బండెక్కిన సూర్యుడిని చూసి ఒక్కొక్కరిగా అందరికీ హోలీ శుభాకాంక్షలు చెప్పుకుని ఇంటిదారి పట్టాయి.

ఇదీ చదవండి: పీఎం స్వనిధి మైక్రో క్రెడిట్ స్కీమ్ అమలులో జీహెచ్ఎంసీ టాప్​