గురుకుల పాఠశాల అడ్మిషన్లలో దళిత క్రిస్టియన్లకు 2 శాతం రిజర్వేషన్లు కల్పించడంపై పూర్తి వివరాలతో కౌంటర్ దాఖలు చేయాలని రాష్ట్ర ప్రభుత్వానికి హైకోర్టు ఆదేశాలు జారీ చేసింది. 5వ తరగతి అడ్మిషన్లకు దరకాస్తులను ఆహ్వానిస్తూ.. సాంఘిక సంక్షేమ శాఖ జారీ చేసిన నోటిఫికేషన్లో దళిత క్రిష్ట్రియన్లకు 2 శాతం సీట్లు కేటాయించడాన్ని సవాలు చేస్తూ హైదరాబాద్కు చెందిన పి. శ్రీనివాస్ ప్రజా ప్రయోజన వ్యాజ్యం దాఖలు చేశారు.
ప్రధాన న్యాయమూర్తి జస్టిస్ ఆర్.ఎస్.చౌహాన్, జస్టిస్ ఎ. అభిషేక్ రెడ్డిలతో కూడిన ధర్మాసనం విచారణ చేపట్టింది. క్రిస్టియన్గా మారిన ఎస్సీలకు రిజర్వేషన్ ఇవ్వడం చెల్లదని పిటిషనర్ తరఫు న్యాయవాది హరినాథ్ తెలిపారు.
మిలియనీర్ అయిపోరు..
ఒక ఎస్సీ వ్యక్తి హిందూ మతం నుంచి క్రిస్టియన్గా మారితే బ్రాహ్మణ వ్యక్తిగానో, మిలియనీరో అయిపోయారని ధర్మాసనం వ్యాఖ్యానించింది. ఇలాంటి వారికి రిజర్వేషన్ నిరాకరించడం సమంజసం కాదంది. ఒక మనిషి మతాన్ని మార్చుకున్నంత మాత్రాన అతని వెనుకబాటుతనం దూరం కాదని వివరించింది. వెనుకబడిన వారి అభివృద్ధికి కేంద్రం రిజర్వేషన్లను అమలు చేస్తోందంది. గత 1000 ఏళ్లుగా దళిత క్రిస్టియన్లుగా మారిన వారికి న్యాయం చేస్తూ రాష్ట్ర ప్రభుత్వం తీసుకున్న నిర్ణయం అభినందనీయమని వ్యాఖ్యానించింది.
4 వారాలకు వాయిదా..
ఈ రిజర్వేషన్ కేవలం గురుకుల పాఠశాలల అడ్మిషన్లకు మాత్రమే వర్తిస్తాయని ప్రభుత్వ ప్రత్యేక న్యాయవాది ఎ. సంజీవ్ కుమార్ అన్నారు. పూర్తి వివరాలతో కౌంటర్లు దాఖలు చేయాలని ప్రభుత్వానికి ధర్మాసనం ఆదేశాలు జారీచేస్తూ విచారణను 4 వారాలకు వాయిదా వేసింది.
ఇదీ చూడండి : అమెరికా వెళ్లొచ్చిన నిట్ విద్యార్థి.. కరోనా అనుమానంతో ఆస్పత్రిలో చేరిక
