ఆన్లైన్ తరగతులపై ప్రభుత్వం స్పష్టమైన, సమగ్ర పాలసీ ఎందుకు రూపొందించడం లేదని రాష్ట్ర ప్రభుత్వాన్ని హైకోర్టు ప్రశ్నించింది. ఆన్లైన్ తరగతులపై ప్రభుత్వ విధానమేంటో ఎల్లుండి లోగా స్పష్టత ఇవ్వాలని ఆదేశించింది. ప్రైవేట్ పాఠశాలల్లో ఆన్లైన్ తరగతులు నిషేధించాలని కోరుతూ హైదరాబాద్ స్కూల్ పేరెంట్స్ అసోసియేషన్ సంయుక్త కార్యదర్శి వెంకట్ హైకోర్టులో ప్రజా ప్రయోజన వ్యాజ్యం దాఖలు చేశారు.
విద్యా సంవత్సరం ఖరారు చేయకముందే...
పిల్పై ప్రధాన న్యాయమూర్తి జస్టిస్ ఆర్ఎస్ చౌహాన్, జస్టిస్ బి. విజయ సేన్ రెడ్డి ధర్మాసనం ఇవాళ విచారణ చేపట్టింది. ప్రభుత్వం విద్యా సంవత్సరం ఖరారు చేయకముందే ప్రైవేట్ పాఠశాలలు ఆన్లైన్ తరగతులు నిర్వహించడం చట్టవిరుద్ధమని పిటిషనర్ తరఫు న్యాయవాది వాదించారు. ఆన్లైన్ తరగతులతో పేద విద్యార్థులకు అన్యాయం జరుగుతోందని.. ఇది రాజ్యాంగం కల్పించిన సమానత్వ హక్కును ఉల్లంఘించడమేనని పేర్కొన్నారు.
ఈ నెల 3 లోగా స్పష్టత ఇవ్వాలి...
జిల్లా విద్యా శాఖ అధికారులు ఈ అంశాన్ని పర్యవేక్షిస్తున్నారని.. చర్యలు తీసుకునే అధికారం డీఈఓలకే ఉందని ప్రభుత్వ ప్రత్యేక న్యాయవాది సంజీవ్ కుమార్ నివేదించారు. ఆన్లైన్ తరగతుల కోసం అందరికీ లాప్టాప్లు, స్మార్ట్ఫోన్లు కొనే ఆర్థిక స్థోమత ఉంటుందా అని హైకోర్టు ప్రశ్నించింది. పలు ప్రాంతాల్లో ఇంటర్నెట్ సదుపాయం కూడా లేదని ప్రభుత్వ ప్రత్యేక న్యాయవాది సంజీవ్ కుమార్ పేర్కొన్నారు. అలాంటప్పుడు ఆన్లైన్ తరగతులపై ప్రభుత్వం స్పష్టమైన, సమగ్రమైన పాలసీని ఎందుకు రూపొందించడం లేదని హైకోర్టు ప్రశ్నించింది. మహారాష్ట్ర, పంజాబ్ ప్రభుత్వాలు కొన్ని మార్గదర్శకాలు ఇచ్చాయని ధర్మాసనం పేర్కొంది. దీనిపై ఈ నెల 3 లోగా స్పష్టత ఇవ్వాలని ఆదేశించింది.
