TSPSC Paper Leak Case Latest Update : తెలంగాణ పబ్లిక్ సర్వీస్ కమిషన్ పరీక్షల లీకేజీకి సంబంధించి సిట్‌తో పాటు ఈడీ దర్యాప్తు పూర్తయ్యేదాక.. గ్రూప్-1 పరీక్షను వాయిదా వేయాలని కోరుతూ హైకోర్టులో పిటిషన్లు దాఖలయ్యాయి. అంతేకాకుండా ఆరోపణలు ఎదుర్కొంటున్న టీఎస్‌పీఎస్సీ నిర్వహించడంపై అభ్యంతరం ఉందని.. యూపీఎస్సీలాంటి మూడో సంస్థకు ఈ బాధ్యతను అప్పగించాలని వారు పిటిషన్‌లో కోరారు.
Petition in High Court to Postpone Group-1 exam : గతేడాది అక్టోబర్‌లో జరిగిన పరీక్షలను రద్దు చేయడంతో పాటు.. ఈనెల 11న గ్రూప్-1 పరీక్ష నిర్వహిస్తున్నట్లు టీఎస్‌పీఎస్సీ నోటిఫికేషన్ జారీ చేసింది. ఈ నోటిఫికేషన్‌ను రద్దు చేయాలని కోరుతూ అశోక్ కుమార్‌తో పాటు మరో నలుగురు టి.రమేశ్, జె.సుధాకర్‌లు వేర్వేరుగా హైకోర్టులో మూడు పిటిషన్లు దాఖలు చేశారు. వీటిపై జస్టిస్ కాజా శరత్ విచారణ చేపట్టారు. పిటిషనర్ల తరఫు న్యాయవాదులు వాదనలు వినిపిస్తూ గత సంవత్సరం జరిగిన పరీక్షలు జరిగాక ప్రశ్నప్రత్రాలు లీకైన విషయం వెలుగులోకి వచ్చిందని న్యాయస్థానానికి తెలిపారు.
TSPSC Paper Leak Case : దీనిపై దర్యాప్తు చేస్తున్న సిట్ ఇప్పటికే 49 మంది దాకా అరెస్ట్ చేసిందని.. ఇది 100కు చేరవచ్చని పిటిషనర్ల తరఫు న్యాయవాదులు హైకోర్టుకు తెలిపారు. ఈ క్రమంలోనే సిట్ ఇచ్చిన ప్రాథమిక నివేదిక ఆధారంగా పరీక్షలు రద్దు చేసి తాజాగా నిర్వహించడానికి నిర్ణయించిందని చెప్పారు. లీకేజీ వ్యవహారంలో టీఎస్‌పీఎస్సీ ఉద్యోగుల పాత్ర కూడా ఉందని.. అలాంటప్పుడు తిరిగి అదే సంస్థ పరీక్ష నిర్వహిస్తే ఆ సంస్థ విశ్వసనీయతపై సందేహాలున్నాయని ధర్మాసనానికి వారు వివరించారు.
పరీక్షల నిర్వహణ బాధ్యతను ప్రత్యేక సంస్థకు అప్పగించాలని హైకోర్టును వారు కోరారు. ఓవైపు దర్యాప్తు జరుగుతోందని.. నిందితులందరూ ఇంకా బయటపడలేదని అయినా పరీక్ష నిర్వహించడానికి కమిషన్ సిద్దపడుతుందని చెప్పారు. కేవలం ఎన్‌ఆర్‌ఐల కోసం పరీక్షలు నిర్వహిస్తున్నట్లుగా ఉందని ఆరోపించారు. పరీక్షలపై 5 లక్షల మంది ఆశావహులున్నారని వివరించారు. పరీక్షలు రద్దుచేయాలని కోరుతూ వినతిపత్రం సమర్పించినట్లు ధర్మాసనానికి పిటిషనర్ల తరఫు న్యాయవాదులు వెల్లడించారు.
Telangana Group-1 Prelims Exam : దీనిపై పబ్లిక్ సర్వీస్ కమిషన్ తరఫు న్యాయవాది ఎం.రాంగోపాల్ రావు వాదనలు వినిపిస్తూ.. లీకేజీ వ్యవహారంలో 49మంది ఉద్యోగులు లేరని, కేవలం ఇద్దరు శాశ్వత, ఇద్దరు ఔట్ సోర్సింగ్ ఉద్యోగులు ఉన్నారని హైకోర్టుకు తెలిపారు. దీనికి బాధ్యులైన వారిని సస్పెండ్ చేసినట్లు పేర్కొన్నారు. పరీక్షల రహస్య విభాగాల పర్యవేక్షణ నిమిత్తం చీఫ్ ఇన్ఫర్మేషన్ సెక్యూరిటీ అధికారి.. అసిస్టెంట్ కంట్రోలర్‌లను నియమిస్తూ ప్రభుత్వం ఉత్తర్వులు జారీచేసిందని ధర్మాసనానికి వివరించారు. ఇప్పటికే గ్రూప్-1 పరీక్ష కోసం రాష్ట్ర వ్యాప్తంగా 994 కేంద్రాల్లో పరీక్షలకు ఏర్పాట్లు జరిగినట్లు చెప్పారు. ఇరువైపులా వాదనలను విన్న న్యాయమూర్తి.. పిటిషనర్లు లేవనెత్తిన అభ్యంతరాలపై పూర్తి వివరాలతో కౌంటర్లు దాఖలు చేయాలని ప్రభుత్వాన్ని ఆదేశిస్తూ విచారణను 5వ తేదీకి వాయిదా వేశారు.
ఇవీ చదవండి : TSPSC Paper Leak Case : 'ఇంకెంత కాలం దర్యాప్తు'.. సిట్ను ప్రశ్నించిన హైకోర్టు
TSPSC Paper Leak Updates : వీళ్లు మామూలోళ్లు కాదు బాబోయ్.. మాస్‌ కాపీయింగ్‌ కోసం ఏకంగా..!
