గ్రేటర్ హైదరాబాద్ పరిధిలో ఫుట్పాత్ల ఆక్రమణలు తొలగించాలని... జీహెచ్ఎంసీని హైకోర్టు ఆదేశించింది. నగరవ్యాప్తంగా సర్వే చేసి ఫుట్పాత్లు లేని ప్రాంతాలను గుర్తించి.. నిర్మించాలని స్పష్టం చేసింది. ఫుట్పాత్లు లేకపోతే పాదచారులు గాల్లో నడుస్తారని అధికారులు అనుకుంటున్నారా అని... ధర్మాసనం వ్యాఖ్యానించింది. ఫుట్పాత్ల ఆక్రమణలపై న్యాయవాది మామిడాల తిరుమలరావు దాఖలు చేసిన ప్రజా ప్రయోజన వ్యాజ్యంపై... ప్రధాన న్యాయమూర్తి జస్టిస్ హిమా కోహ్లి, జస్టిస్ విజయసేన్ రెడ్డి ధర్మాసనం విచారణ చేపట్టింది.
కొన్ని ప్రాంతాల్లో ఫుట్పాత్లు లేవని, మరికొన్ని ప్రాంతాల్లో కబ్జా అయ్యాయని... దానివల్ల పాదచారులు ప్రమాదాలకు గురవుతున్నారని పిటిషనర్ వాదించారు. ఫుట్పాత్లు పాదచారులు మాత్రమే వినియోగించేలా చర్యలు తీసుకోవాలని... హైకోర్టు పేర్కొంది. వీధివ్యాపారుల కోసం ప్రత్యేకంగా స్థలాలు కేటాయించారా అని ధర్మాసనం అడిగింది. వీధివ్యాపారులు సహా ఎవరూ ఫుట్పాత్లను ఆక్రమించడానికి వీల్లేదని.. ఉన్నత న్యాయస్థానం స్పష్టం చేసింది. ఫుట్పాత్ ఆక్రమణలు, తొలగింపునకు చర్యలు, కొత్తగా నిర్మాణం తదితర వివరాలతో... 4 వారాల్లో నివేదిక సమర్పించాలని జీహెచ్ఎంసీ, పోలీసులను హైకోర్టు ఆదేశించింది. పిటిషన్పై ఏప్రిల్ 15న విచారణ చేపడతామని... తమ ఆదేశాలు అమలు కాకపోతే తీవ్రంగా పరిగణిస్తామని హెచ్చరించింది.
ఇదీ చూడండి: మార్చి 14 న రెండు ఎమ్మెల్సీ స్థానాలకు పోలింగ్
