బస్తీమే సవాల్​: మణికొండ మున్సిపాలిటీలో నీటి కరువు తీరేదెప్పుడు..?

పెద్ద పెద్ద బిల్డింగులు... సువిశాల టౌన్​షిప్​లు... అక్కడంతా సినీనటులు, ఐటీ ఉద్యోగులు... హైదరాబాద్ నగరంలో కాస్ట్లీ  ఏరియా మణికొండ పురపోరుకు సై అంటోంది. తాగటానికి చుక్క నీరుండదు... కానీ మురుగు నీరు వీధులు  పొంగిపొర్లుతుంటుంది. పైన మెరుగులే తప్ప ఎన్నో సమస్యలు ఉన్నాయంటున్నారు ఇక్కడి ప్రజలు.

వెండితెర, బుల్లితెరల కళాకారులు, ఐటీ ఉద్యోగుల నివాస కేంద్రంగా ఉన్న మణికొండ పురపోరుకు సిద్ధమైంది. మణికొండ, నెక్నంపూర్, పుప్పాలగూడ గ్రామాలతో ఏర్పడ్డ మున్సిపాలిటీలో మొదటి సారిగా ఎన్నికలు జరుగుతున్నాయి. 20 వార్డులు ఉన్న మణికొండలో.... 48,907 మంది ఓటర్లున్నారు.

మూడేళ్లల్లో తాగునీటి ఖర్చు అక్షరాల రూ.20కోట్లు

పెద్ద పెద్ద బిల్డింగ్​లతో అభివృద్ధి చెందినట్టుగా కన్పిస్తున్న మణికొండలో మంచినీటి సమస్య తాండవిస్తోంది. 2003-04లో ప్రారంభమైన అల్కపూర్​ టౌన్​షిప్​లో ఇప్పటికి వరకు మంచినీటి సౌకర్యమే లేదంటే సమస్య ఎంత తీవ్రంగా ఉందో అర్థం చేసుకోవచ్చు. మంచినీటి కోసం ఒక్కొ అపార్ట్​మెంట్​లో నెలకు రూ.50వేల నుంచి రూ.60వేల వరకు ఖర్చు చేస్తున్నామని కాలనీవాసులు చెబుతున్నారు. గడిచిన మూడేళ్లలో రూ.18 కోట్ల నుంచి రూ.20 కోట్ల వరకు ఖర్చు చేశామంటూ గోడు వెళ్లబోసుకుంటున్నారు. అధికారులు, ప్రజాప్రతినిధులకు ఎన్నిసార్లు ఫిర్యాదు చేసినా... తమ ఆవేదన వివిధ రూపాల్లో వెలిబుచ్చినా ఫలితం మాత్రం శూన్యమంటున్నారు. ఇచ్చిన హామీలను నేతలు గాలికే వదిలేశారని ఆగ్రహం వ్యక్తం చేస్తున్నారు.

మంచినీరు సౌకర్యం లేదు..ప్రత్యామ్నాయం సంగతేంటి..?

మంచినీటి సౌకర్యం ఈ కాలనీకి లేదని హెచ్​ఎండీఎ అధికారులు స్పష్టం చేసినట్లు అల్కాపూర్ టౌన్​షిప్ అధ్యక్షుడు ప్రమోద్​ తెలిపారు. ప్రత్యామ్నాయాలు కల్పిస్తామని హామీ ఇచ్చినా... ఇప్పటికీ కార్యరూపం దాల్చలేదని నిరాశ వ్యక్తం చేశారు. వచ్చే వేసవికాలం నాటికైనా సమస్యను పరిష్కరించి... ఉపశమనం కల్పించాలని కోరుతున్నారు.

సమస్యలు తీర్చేవాళ్లే ఓట్లు అడిగేందుకు రండి..!

హరితహారంలో పాల్గొని మొక్కలు నాటితే... వాటిని సంరక్షించేందుకు జగ్గు నీళ్లు కూడా దిక్కులేవంటూ మహిళలు మండిపడుతున్నారు. తమ సమస్యలు తీర్చేవాళ్లే ఓట్లు అడిగేందుకు రావాలని తేల్చి చెబుతున్నారు. మాటలు చెప్పే వాళ్లు ఇక్కడ అడుగుపెట్టొద్దని హెచ్చరిస్తున్నారు.

ఆరైందంటే రోడ్డు మీద ఉండలేం...

మంచినీటి సమస్యతో పాటు మురుగునీటి సమస్య మున్సిపాలిటీవాసులను వేధిస్తోంది. రోడ్లమీద ఎప్పుడూ మురుగు పారుతూనే ఉంటుందని స్థానికులు వాపోతున్నారు. నెక్నాంపూర్ పెద్దచెరువు, చిన్న చెరువుల అభివృద్దికి ప్రభుత్వం రూ.22 కోట్లు వెచ్చించినా...పనులు ఇప్పటికీ జరగడం లేదంటున్నారు. డ్రైనేజీ సమస్య వల్ల దోమలు బాగా పెరిగిపోయి... 6 అయిందంటే రోడ్డు మీద నిలవలేని పరిస్థితి ఉందంటున్నారు. డెంగీలాంటి రోగాలతో అనారోగ్యం పాలవుతున్నామని ఆవేదన వ్యక్తం చేస్తున్నారు.

ఈ సమస్యలు చాలవన్నట్టు... రహదారులు, వీధి దీపాల సమస్యలు ఎప్పుడూ ఇబ్బంది పెడుతూనే ఉన్నాయంటూ నిట్టూరుస్తున్నారు మణికొండ మున్సిపాలిటీ వాసులు. సమస్యలను పరిష్కరించేలా కృషి చేస్తామని హామీ ఇస్తేనే ఓట్లేస్తామని బల్లగుద్ది చెబుతున్నారు.

ఇవీ చూడండి: పురపోరుకు సై అంటున్న రియల్టర్లు