రాష్ట్ర పురపాలక ఎన్నికల్లో రియల్‌ఎస్టేట్‌ వ్యాపారుల దూకుడు కొనసాగుతోంది. పురపాలక పదవులను దక్కించుకునేందుకు భారీ సంఖ్యలో స్థిరాస్తి వ్యాపారులు రంగంలోకి దిగారు. పరోక్షంగా రాజకీయ నాయకులు, ప్రజాప్రతినిధులకు మద్దతుగా నిలుస్తున్న రియల్టర్లు ఈ సారి ఎన్నికల బరిలో దిగారు. రాజకీయంగా ఎదిగేందుకు... వ్యాపారాలను పదిలం చేసుకునేందుకు ఇదో అవకాశంగా వారు భావిస్తున్నారు. మేయర్, ఛైర్‌పర్సన్‌ పదవులు దక్కించుకునేందుకు వందల మంది నామినేషన్లు వేశారు. హైదరాబాద్ మహానగరం చుట్టూ ఉన్న ఏడు నగరపాలక సంస్థలు, 21 పురపాలక సంఘాలతో పాటు జిల్లాల్లో కొత్త మున్సిపాలిటీల్లో పదవులపై వీరు ఎక్కువగా దృష్టి సారించారు. ఈ ప్రాంతాల్లో బరిలో నిలిచిన అభ్యర్థుల్లో 70 శాతం మంది వీరే.
కొత్త మున్సిపాలిటీల్లో పోటాపోటీ...
మేయర్, ఛైర్‌పర్సన్‌ పదవి కోసం రూ.కోట్లు వ్యయం చేసేందుకు సిద్ధమని స్థిరాస్తి వ్యాపారులు ముందుకు వస్తుండటం వల్ల పార్టీలు వారివైపే మొగ్గుచూపుతున్నాయి. ప్రధానంగా అనుమతులు, వెంచర్లు వేసినపుడు సహా అనేక సందర్భాల్లో ఇబ్బందులు వస్తున్నాయి... తామే పదవి దక్కించుకుంటే వ్యాపారానికి సమస్య ఉండదనే కుటుంబసభ్యులను బరిలో దింపినట్లు శివారు నగరపాలక సంస్థ మేయర్ పదవిపై దృష్టిసారించిన స్థిరాస్తి వ్యాపారి తెలిపారు. ఎన్నికల్లో భారీగా వ్యయం చేయాల్సి ఉందని, కొన్ని చోట్ల వార్డులకు రూ.20 లక్షల నుంచి రూ.50 లక్షల దాకా కూడా ఖర్చు చేస్తారని, ఇలాంటి పరిస్థితుల్లో స్థిరాస్తి వ్యాపారులు కాకుండా ఇతరులపై ఆధారపడలేమని పార్టీ నేత ఒకరు స్పష్టం చేయడం గమనార్హం. టికెట్ దక్కించుకునేందుకే ఏకంగా రూ.85లక్షల వరకు వెచ్చించానని ఓ స్థిరాస్తి వ్యాపారి బాహాటంగా చెబుతుండటం విశేషం.
వ్యాపారుల జోరు ఇలా..
* తెల్లాపూర్, అమీన్పూర్, బొల్లారం, సంగారెడ్డిల్లో పలువురు రియల్ ఎస్టేట్ వ్యాపారులు నామినేషన్లు దాఖలు చేశారు. సూర్యాపేట, కోదాడ, హుజూర్‌నగర్‌, యాదగరిగుట్టలోనూ ఇదే పరిస్థితి ఉంది. నిజామాబాద్, కామారెడ్డి జిల్లాల్లోని పురపాలక సంఘాల్లో స్థిరాస్తి వ్యాపారులు బరిలో నిలిచారు.
* బోడుప్పల్లో 18 మంది స్థిరాస్తి వ్యాపారులు రంగంలోకి దిగారు.
* పీర్జాదిగూడలో స్థిరాస్తి వ్యాపారం చేసే 11 మంది బరిలో నిలిచారు.
* ఆదిభట్లలోఒకే వార్డులో ఇద్దరు రియల్టర్లు పోటీకి సై అంటున్నారు.
* తుక్కుగూడ, పోచారంలో స్థిరాస్తి వ్యాపారులు నిత్యం లక్షల వ్యయంతో విందులతో పోటీపడుతున్నారు.
* మణికొండ, నార్సింగి, బండ్లగూడజాగీర్‌ ప్రాంతాల్లో పోటీ చేసే అభ్యర్థుల్లో అత్యధికం స్థిరాస్తి వ్యాపారులే ఉన్నారు.
* మేడ్చల్ నియోజకవర్గంలోని తూంకుంట మున్సిపాలిటీలో 16 వార్డులు ఉండగా 12 మంది రియల్ వ్యాపారులు బరిలో నిలిచారు.
ఇదీ చూడండి: 21 వేల 850 నామినేషన్లు.. నేడు పరిశీలన
