తెలంగాణలో ఎన్నికల వేళ మద్యం విక్రయాల జోష్​

తెలంగాణలో ఎన్నికల వేళ మద్యం అమ్మకాలు మరింత పుంజుకున్నాయి. మూడు నెలల్లోనే దాదాపు రూ. 5000 కోట్లకు పైగా మద్యం విక్రయాలు జరిగినట్లు అబ్కారీ శాఖ వెల్లడించింది. ఇదే సమయంలో అక్రమ నిల్వలు, గుడుంబా తయారీపై నిఘా పెంచారు. నిబంధనలు ఉల్లంఘిస్తే కఠిన చర్యలు తీసుకుంటామని అధికారులు హెచ్చరించారు.

రాష్ట్రంలో ఎన్నికల వేళ మద్యం అమ్మకాలు గణనీయంగా పెరుగుతున్నాయి. గత మూడు నెలల్లో దాదాపు రూ. 5,400 కోట్లు విలువైన మద్యం విక్రయాలు జరిగినట్లు అబ్కారీ శాఖ లెక్కలు వెల్లడిస్తున్నాయి. గతేడాదితో పోలిస్తే ఈసారి రూ. 900 కోట్లు అధికంగా లిక్కర్​ అమ్మకాలు జరిగినట్లు అధికారులు చెబుతున్నారు. అయితే ఎన్నికల ప్రకటన వెలువడిన తర్వాత మార్చిలో అమ్మకాలు కొంత తగ్గడం అబ్కారీ శాఖను విస్మయానికి గురి చేస్తోంది.

హైదరాబాద్​లోనే అధికం

రాష్ట్రంలో ఇతర జిల్లాలతో పోలిస్తే హైదరాబాద్​, మేడ్చల్​, రంగారెడ్డి జిల్లాలో అత్యధికంగా మందుబాబులు మద్యం సేవించారు. మూడు నెలల కాలంలో హైదరాబాద్​లో రూ. 628 కోట్లు, రంగారెడ్డి రూ. 687 కోట్లు, మేడ్చల్​లో రూ. 582 కోట్ల మేర లిక్కర్​ విక్రయాలు జరిగాయి.

నిఘా తీవ్రం

రాష్ట్ర వ్యాప్తంగా ఎన్నికల కోడ్​ అమల్లో ఉన్నందున మద్యం విక్రయాలు, అక్రమ నిల్వలపై అబ్కారీ అధికారులు నిఘా తీవ్రం చేశారు. బల్క్​లో కొనుగోళ్లపై నిబంధనలు విధించారు. గుడుంబా తయారీ కేంద్రాలపై ప్రత్యేక దృష్టి పెట్టారు. ఎన్నికల నియమావళి ఉల్లంఘిస్తే కఠిన చర్యలు తప్పవని హెచ్చరిస్తున్నారు.

ఇదీ చదవండి : 'మాటమీద ఎవరుంటారో ప్రజలకు తెలుసు'​