యూరియా సమస్యపై సర్కారు ప్రత్యేక దృష్టి

రాష్ట్రంలో యూరియా కొరతను తీర్చేందుకు ప్రభుత్వం ప్రత్యేక దృష్టి సారించింది. సీఎం కేసీఆర్​ ఆదేశాల మేరకు నలుగురు ప్రత్యేక అధికారులను నియమించారు. మూడు రోజుల్లో సమస్యను పరిష్కరించాలని లక్ష్యంగా పెట్టుకున్నట్లు వ్యవసాయ శాఖ వర్గాలు తెలిపాయి.

రాష్ట్రంలో యూరియా సమస్యపై సర్కారు ప్రత్యేక దృష్టి సారించింది. ముఖ్యమంత్రి కేసీఆర్ ఆదేశాల మేరకు నాలుగు నౌకాశ్రయాలకు ప్రత్యేక అధికారులను నియమించింది. విశాఖపట్నం నౌకాశ్రయం - మధుమోహన్‌, కాకినాడ - తులసీరాం, కృష్ణపట్నం - శివానంద్, గంగవరం పోర్ట్‌కు తిరుపతినాయక్ నియమితులయ్యారు. ఈ మేరకు వ్యవసాయ శాఖ కమిషనర్ రాహుల్ బొజ్జ ఉత్తర్వులు జారీ చేశారు. రైళ్ల ద్వారా యూరియా సరఫరా.. తదితర బాధ్యతలను ప్రత్యేక అధికారులు పర్యవేక్షించనున్నారు.

రైతుల ఆందోళనతో చర్యలు

ఈ ఏడాది ఖరీఫ్​ సీజన్​ దృష్ట్యా... నిజామాబాద్​, కామారెడ్డి, జగిత్యాల, నిర్మల్‌, ఖమ్మం, సంగారెడ్డి, మెదక్, సిద్దిపేట, నల్గొండ జిల్లాల్లో యూరియా దొరక్క రైతులు రోడ్లెక్కి ఆందోళనబాట పట్టారు. యూరియా బస్తాల కోసం సొసైటీల వద్ద క్యూలో నిలబడిన ఇద్దరు రైతులు మరణించడం వల్ల దుమారం చెలరేగింది. ఈ విషయం సర్కారు తలనొప్పిగా పరిణమించడం వల్ల సీఎం కేసీఆర్​ వ్యవసాయ మంత్రి నిరంజన్​ రెడ్డి, మార్క్​ఫెడ్​ ఉన్నతాధికారులతో యూరియా కొరతపై సమీక్షించారు. ఈ నేపథ్యంలో 3 రోజుల్లోగా యూరియా సమస్యకు ముగింపు పలకాన్నది లక్ష్యంగా పెట్టుకున్నట్లు వ్యవసాయ శాఖ వర్గాలు తెలిపాయి.

ఇదీ చూడండి : 'విక్రమ్' కోసం మరో 14 రోజులు అన్వేషణ​ : శివన్