ఇందిరమ్మ ఇళ్ల సర్వేలో అడిగే ప్రశ్నలు ఇవే - ఆ పథకం కింద లబ్ధి పొందితే ఇల్లు రాదట

ఇందిరమ్మ ఇళ్ల సర్వేలో అర్హుల గుర్తింపు - యాప్‌లో సాంకేతిక సమస్యలు - సర్వేయర్లకు సవాల్‌గా మారిన సర్వే

Samagra Kutumba Survey Questions In App : రాష్ట్ర ప్రభుత్వం ప్రతిష్ఠాత్మకంగా చేపట్టిన ఇందిరమ్మ ఇళ్ల పథకానికి అర్హులను గుర్తించేందుకు సర్వే కొనసాగుతోంది. సెల్‌ఫోన్​లో యాప్‌ డౌన్‌లోడ్‌ చేసుకుని సర్వే చేస్తున్నారు. ప్రజా పాలనలో ఇళ్ల కోసం మొత్తం 3,02,696 దరఖాస్తులు వచ్చాయి. అందులో అర్హులను గుర్తించేందుకు యాప్‌ను వాడుతున్నారు. తొలి విడతలో సొంత స్థలం ఉన్నవారికి ప్రభుత్వం రూ.5 లక్షలు అందిస్తామని ఇదివరకే స్పష్టం చేసింది. ఒక్కో నియోజకవర్గానికి 3,500 ఇళ్లకు రూ.5 లక్షల చొప్పున ఆర్థిక సహాయం అందనుంది.

ఒకవైపు సర్వే - మరోవైపు యాప్‌ ఇబ్బందులు : ఒకవైపు సర్వే చేస్తుండగా మరోవైపు ఇందిరమ్మ ఇళ్ల ప్రత్యేక యాప్‌లో సాంకేతిక సమస్యలు తలెత్తుతున్నాయి. వివరాలు నిక్షిప్తం చేసే సమయంలో సర్వేయర్లు ఇబ్బందులు ఎదుర్కొంటున్నారు. ప్రజా పాలన దరఖాస్తులో రాసిన చిరునామాకు వెళ్తే కొందరు అందుబాటులో ఉండడం లేదు. సమయానికి వారు దొరకడం లేదు. అప్లికేషన్​లో రాసిన సెల్‌ఫోన్ నంబర్ పని చేయడం లేదు. ముఖ్యంగా శివారు గ్రామాల్లో యాప్‌ తెరుచుకోవడం లేదు. దీంతో సర్వే చేసే వారికి వివరాలు పొందుపరచడం ఇబ్బందిగా మారింది. ఇదిలా ఉండగా అధికారులు ఈ నెల 31లోపు సర్వే పూర్తి చేయాలని ప్రభుత్వం ఇప్పటికే ఆదేశాలు జారీ చేసింది. సాంకేతిక ఇబ్బందుల కారణంగా గడువులోగా సర్వే పూర్తి చేయడం సందేహంగానే ఉంది.

ఇంటికి వచ్చిన సర్వేయర్లు యాప్‌లో వివరాలు పొందుపరచడానికి అడిగే ప్రశ్నలు ఇవే :

• యాప్‌లో దరఖాస్తుదారుడు గతంలో ఇందిరమ్మ ఇంటి పథకం కింద ఇళ్లు పొందారా? లేదా?
• ప్రస్తుతం ఇల్లు ఎలా ఉంది? పైకప్పు వివరాలు, కుటుంబ సభ్యుల వివరాలు, వారి వివాహ స్థితిగతులపై ఆరా తీస్తున్నారు.
• సొంత స్థలం ఉంటే అందుకు సంబంధించిన రిజిస్ట్రేషన్‌ పత్రాలు ఉన్నాయా? లేదా? చూస్తున్నారు. అవి లేకుంటే ఇంటి పన్ను రశీదు, కరెంటు బిల్లు, సాదాబైనామా పత్రం ఉంటే వాటిని స్కానింగ్‌ చేసి యాప్‌లో పెడుతున్నారు.
• ప్రస్తుతం ఉంటున్న ఇంటి వద్ద, సొంత స్థలం వద్ద యజమానిని నిల్చోబెట్టి ఫొటో తీస్తున్నారు.
• గతంలో ఇందిరమ్మ ఇల్లు తీసుకుంటే అనర్హులుగా గుర్తిస్తున్నారు.