బయోటెక్‌ రంగ ప్రముఖులు డాక్టర్ బి.ఎస్.బజాజ్ మృతి పట్ల గవర్నర్ తమిళిసై సౌందరరాజన్ సంతాపం వ్యక్తం చేశారు. ఈ సందర్భంగా ఫెడరేషన్‌ ఆఫ్ ఆసియన్‌ బయోటెక్‌ అసోసియేషన్స్‌ వ్యవస్థాపక కార్యదర్శిగా బజాజ్ చేసిన సేవలను ఆమె గుర్తు చేసుకున్నారు.
బజాజ్.. బయో టెక్నాలజీ రంగంలో హైదరాబాద్‌కు ప్రత్యేక గుర్తింపు తీసుకొచ్చారని గవర్నర్ కొనియాడారు. జినోమ్ వ్యాలీ, బయో ఆసియా కోసం ఆయన ఎంతగానో ప్రయత్నించారని పేర్కొన్నారు. ఈ సందర్భంగా ఆయన కుటుంబ సభ్యులకు ప్రగాఢ సానుభూతి తెలిపారు.
కేటీఆర్ సైతం..
మరోవైపు పురపాలక శాఖ మంత్రి కేటీఆర్ సైతం బజాజ్ మృతి పట్ల విచారం వ్యక్తం చేశారు. ఆయన ఆత్మకు శాంతి చేకూరాలని అన్నారు. బయో టెక్నాలజీ రంగ అభివృద్ధికి డాక్టర్ బి.ఎస్. బజాజ్ ఎంతగానో కృషి చేశారన్న మంత్రి.. ఈ సందర్భంగా ఆయన కుటుంబ సభ్యులకు ప్రగాఢ సానుభూతి తెలిపారు.
