Fire Accident In Hyderabad: హైదరాబాద్ నగరంలో వరుస అగ్ని ప్రమాదాలు ప్రజలను బెంబేలెత్తిస్తున్నాయి. సికింద్రాబాద్ అగ్ని ప్రమాద ఘటన జరిగిన విషయాన్ని మరిచిపోక ముందే.. ఆ తర్వాత స్వప్నలోక్ కాంప్లెక్స్లో భారీ అగ్ని ప్రమాదం జరిగింది. ఈ రెండు ఘటనల్లో సుమారు 8 మంది మృతి చెందారు. అయితే తాజాగా మళ్లీ మరో భారీ అగ్ని ప్రమాదం.. మల్లాపూర్ పారిశ్రామికవాడలో చోటుచేసుకుంది. ఈ అగ్ని ప్రమాదం పెయింటింగ్ రసాయన పరిశ్రమలో జరగడంతో.. మంటలు భారీ ఎత్తున ఎగిసిపడుతున్నాయి.
ఈ మంటల ఉద్ధృతికి ఆ పారిశ్రామికవాడ పక్కనే ఉన్న బాబానగర్ కాలనీ వాసులు భయంతో బయటకు పరుగులు తీశారు. పొగలు పెద్ద ఎత్తున వ్యాపించడంతో.. ప్రజలు ఆందోళన చెందుతున్నారు. వెంటనే స్థానికులు నాచారం అగ్నిమాపక సిబ్బందికి సమాచారం అందించారు. సంఘటన స్థలానికి చేరుకున్న అగ్ని మాపక సిబ్బంది ఫైర్ ఇంజన్లతో మంటలను అదుపులోకి తీసుకొని వచ్చే ప్రయత్నం చేస్తున్నారు. మొత్తం 11 అగ్ని మాపక శకటాలతో మంటలను అగ్నిమాపక శాఖ, జీహెచ్ఎంసీ టీఆర్ఎస్ బృందం అదుపులోకి తీసుకువచ్చింది. ఇంకా ఈ విషయంపై పూర్తి సమాచారం తెలియాల్సి ఉంది. ప్రాణ, ఆస్తి నష్టం ఏమైనా సంభవించాయా అనే అంశంపై పూర్తి సమాచారం లేదు.
ఇవీ చదవండి:
