charging stations for electric vehicles : రాష్ట్రంలో విద్యుత్ వాహనాల కోసం మరిన్ని ఛార్జింగ్ స్టేషన్లు అందుబాటులోకి రానున్నాయి. ప్రస్తుతం నగరంలో 70 ఛార్జింగ్ స్టేషన్లుండగా మరో 118 ఏర్పాటు చేయడానికి సన్నాహాలు జరుగుతున్నాయి. విద్యుత్ వాహనదారులకు అందుబాటులో ఉండటమే కాదు చిరువ్యాపారులు తమ వద్ద వీటిని ఏర్పాటు చేసుకుని అదనపు ఆదాయం పెంచుకునేలా వెసులుబాటు కలగనుంది. మహానగరంలో విద్యుత్ వాహనాల వినియోగం క్రమంగా పెరుగుతోంది. దీంతో ఛార్జింగ్ స్టేషన్లకు డిమాండ్‌ ఏర్పడింది.
ఎవరైనా ఏర్పాటు చేసుకోవచ్చు..
నగరవ్యాప్తంగా సింగిల్‌ ఛార్జర్‌ ఉండే పాయింట్ల ఏర్పాటుకు రెడ్‌కో అధికారులు ప్రణాళికలు రచిస్తున్నారు. ద్విచక్ర వాహనాలకు ఉపయోగపడేలా 3 కిలోవాట్‌ సామర్థ్యంతో ఇవి పనిచేయనున్నాయి. 2-3 కిలోవాట్ల సామర్థ్యంతో ద్విచక్ర వాహనాలు 60 కి.మీ. నుంచి 100 కి.మీ. వరకు ప్రయాణిస్తాయి. ఒక కిలోవాట్‌ సుమారు రూ.6 ఖర్చు అవుతుంది. వాహనానికి ఛార్జింగ్ చేసే యూనిట్లు.. వాహన సామర్థ్యం ఆధారంగా వారి లాభాలు కలుపుకొని రుసుము వసూలు చేసుకోవచ్చు. ఒక్కో ఛార్జింగ్ పాయింట్‌కు రూ.15 వేల వరకు ఖర్చయ్యే అవకాశం ఉంది. దీంతో మున్ముందు హోటళ్లు, కిరాణా దుకాణాలు, పాన్‌షాపుల వద్ద ఇవి ఎక్కువ సంఖ్యలో కనిపించనున్నాయి.
ఛార్జింగ్ పాయింట్లున్న ప్రాంతాలివే..
ఇప్పుడు కొన్ని సంస్థలు వాటి షోరూమ్‌ల ముందే ఛార్జింగ్ పాయింట్లను ఏర్పాటు చేసుకుంటుంటే మరికొన్ని ప్రయివేటు సంస్థలు నగరవ్యాప్తంగా వీటిని ఏర్పాటు చేస్తున్నాయి. ప్రస్తుతం బేగంపేట్‌ ఎస్పీరోడ్‌లో ఛార్జ్‌ అండ్‌ డ్రైవ్‌ ఛార్జింగ్ స్టేషన్‌, చికోటీ గార్డెన్స్‌లో ఫోర్టమ్‌ మహీంద్రా ఛార్జింగ్‌స్టేషన్‌, పంజాగుట్టలో నెక్స్ట్‌ గల్లేరియా మాల్‌ సమీపంలో ఎలక్ట్రిక్‌ వెహికిల్‌ ఛార్జింగ్‌స్టేషన్‌, బేగంపేట్‌ పైవంతెన సమీపంలో, రాజ్‌భవన్‌రోడ్‌, సికింద్రాబాద్‌ ఎస్పీరోడ్‌ సమీపంలోని వికాస టవర్స్‌ వద్ద ఆటమ్‌ ఛార్జ్‌, బంజారాహిల్స్‌లోని బీఎన్‌ఆర్‌ కాలనీ, రోడ్‌నెం.2 రెయిన్‌బో హాస్పిటల్‌ వద్ద, పార్క్‌ హయత్‌ సమీపంలోని కాజమ్‌ ఛార్జింగ్ స్టేషన్‌, జూబ్లీహిల్స్‌ చెక్‌పోస్ట్‌రోడ్‌, హైదర్‌నగర్‌, గ్రీన్‌ల్యాండ్స్‌ రోడ్‌లో టాటా ఛార్జింగ్ స్టేషన్‌, హబ్సిగూడ ఎన్జీఆర్‌ఐ వద్ద, నాచారం తదితర ప్రాంతాల్లో ఛార్జింగ్ పాయింట్లు అందుబాటులో ఉన్నాయి.
ఇదీ చదవండి: Bullet proof vest: మరింత తేలికగా బుల్లెట్ ప్రూఫ్ బనియన్
