Tollywood Drugs Case: నవదీప్, హరిప్రీత్​సింగ్​లపై ఈడీ ప్రశ్నల వర్షం... మళ్లీ పిలుస్తారా?

టాలీవుడ్ మత్తుమందుల కేసులో ఈడీ దూకుడు కొనసాగిస్తోంది. డ్రగ్స్ వ్యవహారంలో జరిగిన లావాదేవీలపై ప్రత్యేక దృష్టి పెట్టిన ఈడీ.. వరుసగా ఒక్కొక్కరినీ విచారిస్తోంది. ఇందులో భాగంగానే సోమవారం సినీనటుడు నవదీప్​ను సుధీర్ఘంగా విచారించారు. 9 గంటలకు పైగా కొనసాగిన విచారణలో అతని బ్యాంకు లావాదేవీలు పరిశీలించారు. ఎఫ్​-క్లబ్​కి సంబంధించిన బ్యాంకు ఖాతాల వివరాలు, అనుమానాస్పద లావాదేవీలపై ప్రశ్నల వర్షం కురిపించారు.

ఈడీ విచారణకు సినీ హీరో నవదీప్

సినీతారల డ్రగ్స్​ కేసులో ఈడీ అధికారులు కీలక ఆధారాలను సేకరిస్తున్నారు. ఇప్పటికే సినీ రంగానికి చెందిన పలువురిని విచారించిన అధికారులు.. సోమవారం హీరో నవదీప్​తో పాటు ఎఫ్​-క్లబ్​ మేనేజర్​ హర్​ప్రీత్​సింగ్​ను విచారించారు. దాదాపు 9 గంటలపాటు వారిద్దరినీ ఈడీ అధికారులు ప్రశ్నించారు. కెల్విన్​ ముఠాతో నవదీప్​కు ఉన్న సంబంధాలు, ఆర్థిక లావాదేవీలపైనే అనేక ప్రశ్నలు వేసినట్లు తెలుస్తోంది. నవదీప్​ చేస్తున్న వ్యాపారాలకు సంబంధించిన బ్యాంకు లావాదేవీల వివరాలను కూడా ముందుగానే తెప్పించి పెట్టుకున్న ఈడీ అధికారులు.. వాటి గురించి కూలంకషంగా ప్రశ్నించారు. ఎఫ్​-క్లబ్​ నవదీప్ ఆధ్వర్యంలోనే నడిచేదనే వాదన కూడా ఉంది.

2017లో మత్తుమందుల కేసు నమోదైన తర్వాత ఈ క్లబ్​ను మూసివేశారు. అనేక మంది సినీ ప్రముఖులు ఈ క్లబ్​లో కలిసేవారని, అక్కడ మత్తుమందుల సరఫరా జరిగేదని గతంలోనే ఆరోపణలు వినిపించాయి. ఆబ్కారీ అధికారులు జరిపిన విచారణలో ఈ అన్ని అంశాలపైనా అప్పట్లోనే నవదీప్​ను ప్రశ్నించారు. మత్తుమందులకు చెల్లింపులు ఈ క్లబ్​ ద్వారా జరిగాయన్న అనుమానాలు నివృత్తి చేసుకునే ఉద్దేశంతోనే అప్పట్లో దీనికి మేనేజర్​గా వ్యవహరించిన హరిప్రీత్​సింగ్​ను ఈడీ అధికారులు పిలిపించి విచారించారు. ఇద్దరినీ కలిపి విచారించిన ఈడీ అధికారులు.. క్లబ్​ను మూసివేయడానికి గల కారణాలనూ ఆరా తీసినట్లు తెలుస్తోంది. ఆర్థికంగా నష్టాలు రావడం వల్లే దీన్ని మూసివేయాల్సి వచ్చిందని, అంతకు మించి మరేమీ లేదని ఇద్దరూ సమాధానం చెప్పినట్లు సమాచారం. అలానే కెల్విన్​తో తనకు ఎలాంటి సంబంధాలు లేవని, మత్తుమందుల వాడకం గురించి తమకు తెలియదని, ఆబ్కారీ విచారణలోనే ఇది బయటపడిందని నవదీప్ ఈడీ అధికారులకు స్పష్టం చేసినట్లు తెలుస్తోంది.

రేపు ఈడీ ముందుకు ముమైత్​..

అన్ని వివరాలూ నమోదు చేసుకున్న ఈడీ అధికారులు.. అవసరమైతే మరోమారు హాజరుకావాల్సి ఉంటుందని స్పష్టం చేశారు. ఉదయం 11 గంటల ప్రాంతంలో ఈడీ కార్యాలయానికి వచ్చిన నవదీప్, హరిప్రీత్​సింగ్​లు రాత్రి 8.30 గంటలకు తిరిగి వెళ్లిపోయారు. రేపు ఈడీ ముందు ముమైత్​ఖాన్​ హాజరవ్వాల్సి ఉంది. ముమైత్​ఖాన్​ విచారణలోనూ కెల్విన్​ను మరోసారి ఈడీ కార్యాలయానికి తీసుకువచ్చే అవకాశం ఉంది. ప్రధానంగా కెల్విన్ ఎవరికి మత్తు పదార్థాలు సరఫరా చేశారు. వారి నుంచి ఇతనికి డబ్బులు ఎలా అందాయి అనే దానిపైనే ఈడీ దృష్టి సారించింది.

సంబంధిత కథనాలు..