corona vaccination: గతేడాది దేశవ్యాప్తంగా కొవిడ్ మహమ్మారి వెలుగు చూసిన తర్వాత వైరస్‌కు వ్యతిరేకంగా పనిచేసే ముందులపట్ల ఎంతో ఆసక్తి పెరిగింది. పరిశోధనల ఫలితంగా కేవలం 8 నెలల వ్యవధిలోనే భారత్‌లో కొవిడ్ టీకాలు అందుబాటులోకి వచ్చింది. తొలినాళ్లలో టీకా పట్ల ఉన్న అపోహల నేపథ్యంలో వ్యాక్సినేషన్‌కు ఆదరణ తక్కువగా వచ్చినా... కేంద్ర, రాష్ట్ర ప్రభుత్వాల ప్రణాళికల ఫలితంగా వ్యాక్సినేషన్‌కు ఆదరణ పెరిగింది. రాష్ట్రంలో 18 ఏళ్లు పైబడిన దాదాపు 2.7 కోట్ల మంది కొవిడ్ అర్హత కలిగి ఉండగా అందులో... ఇప్పటికే 2.6 కోట్ల మందికి పైగా ఒక డోస్ టీకా పూర్తి చేసుకున్నారు. అందులో ఆరోగ్య సిబ్బంది 30,07,893 మంది కాగా... ఫ్రంట్‌ లైన్‌ వర్కర్లు 31,09,162 మంది ఉన్నారు. 18 నుంచి 44 మధ్య వయస్కుల్లో 1,56,32,689 మంది టీకా తీసుకున్నారు. ఇక 45 ఏళ్లు పై బడిన వారు 99 లక్షల 52 వేల 55 మంది ఉన్నారు. ఇక ఇప్పటికే రాష్ట్రంలో నాలుగు కోట్ల టీకా డోసుల పంపిణీ చేసిన వైద్య ఆరోగ్య శాఖ... నెలాఖరు నాటికి వందశాతం మందికి టీకా పంపిణీ పూర్తి చేయాలని ముందుకు సాగుతోంది.
ఆసక్తి చూపని ప్రజలు...
covid vaccination: తొలి డోస్ వ్యాక్సినేషన్‌కు వచ్చిన స్పందన మాత్రం రెండో డోస్‌కు కొరవడింది. రాష్ట్రంలో ఇప్పటి వరకు కేవలం కోటీ 40 లక్షల 67 వేల 216 మంది మాత్రమే రెండో డోస్ టీకా తీసుకున్నారు. అంటే మరో కోటీ 21 లక్షల 44 వేల 583 మంది రెండో డోస్ టీకా తీసుకోవాల్సి ఉంది. అయితే వీరిలో ఏకంగా సుమారు 79 లక్షల మంది డిసెంబర్ చివరి నాటికి... రెండో డోస్ తీసుకోవాల్సిన గడువు ముగుస్తున్నా ఇప్పటికీ రెండో డోస్ పట్ల లక్షల మంది ఆసక్తి చూపటం లేదని అధికారిక లెక్కలు చెబుతున్నాయి.
టీకాలు అందుబాటులో ఉన్నా..
2nd dose vaccination: ఈ ఏడాది తొలినాళ్లలో కొవిడ్ సెకండ్ వేవ్ ఉద్ధృతంగా ఉండటంతోపాటు డెల్టా వేరియంట్ వేగంగా వ్యాపిస్తూ ప్రాణాంతకంగా మారింది. దీంతో ఆందోళనకు గురైన ప్రజల నుంచి టీకాలకు విశేష స్పందన లభించింది. వ్యాక్సిన్ కేంద్రాల వద్ద బారులు తీరి వ్యాక్సిన్ తీసుకున్నారు ప్రజలు. ఇక ఒకానొక సమయంలో ప్రభుత్వం వద్ద సరిపడ టీకా డోసులు లేక వారాలకు వారాలు టీకా కార్యక్రమాలకు విరామం ఇచ్చిన పరిస్థితి. కానీ ఇప్పుడు అందుకు భిన్నం. ప్రభుత్వం వద్ద దాదాపు 80లక్షలకు పైగా టీకాలు అందుబాటులో ఉన్నా.. రెండో డోస్ తీసుకునేందుకు మాత్రం పెద్దగా ఆసక్తి చూపటం లేదని అధికారిక లెక్కలు చెబుతున్నాయి.
టీకా సర్టిఫికెట్లు ఉన్నవారినే...
కొవిడ్ కేసుల ప్రభావం తగ్గటంతో... కొంత వ్యాక్సినేషన్ పట్ల నిరసక్తి పెరిగినట్టు అధికారులు భావిస్తున్నారు. ఇక ఇప్పటికీ మరికొందరికి మాత్రం టీకాల పట్ల ఉన్న ఆందోళనతో వ్యాక్సినేషన్‌కు దూరంగా ఉంటున్నారు. ఈ నేపథ్యంలో భవిష్యత్తులో కొవిడ్ టీకా సర్టిఫికెట్లు ఉన్నవారినే పబ్లిక్ ప్రదేశాలకు అనుమతించే అవకాశం ఉందని ప్రభుత్వం ముందస్తుగా హెచ్చరిస్తోంది. ప్రజలు రెండు డోసులు తీసుకుని వైరస్‌ను పూర్తిస్థాయిలో తరిమికొట్టాలని కోరుతోంది.
ఇదీ చదవండి: చిట్టెలుక తెచ్చిన 'కొవిడ్' తంటా.. ఆరోగ్య శాఖ అప్రమత్తం!
