నగరంలో నిత్యం ప్రయాణం చేయాల్సివచ్చిన వారి వద్ద కచ్చితంగా బస్పాస్ ఉండేది. అన్నిసార్లు టికెట్ కొనుక్కునే అవసరం లేకపోవడం, మంత్లీపాస్ తక్కువ ధరకే రావడం, సిటీ అంతా చుట్టొచ్చే సౌలభ్యం ఉండడం వల్ల బస్పాస్లు హాట్కేకుల్లా అమ్ముడయ్యేవి. బస్పాస్ కౌంటర్ల దగ్గర ఎప్పుడూ జన కిక్కిరిసిపోయి ఉండేవారు. ఆర్టీసీకి కచ్చితమైన ఆదాయం వచ్చేది. అయితే ఇదంతా కొవిడ్కు మందున్న పరిస్థితి. ఇప్పుడు అందుకు భిన్నంగా ఉంది.
భారీగా పడిపోయిన ఆదాయం
ఒకప్పుడు బస్పాస్ కౌంటర్లు విద్యార్థులు, ప్రభుత్వ, ప్రైవేట్ ఉద్యోగులు, కార్మికులు వివిధ రంగాలకు చెందిన ప్రయాణికులతో కళకళలాడేవి. ప్రస్తుతం బస్పాస్లు తీసుకునేవారులేక వెలవెలబోతున్నాయి. కరోనాకు ముందు గ్రేటర్ ఆర్టీసీకి నెలకు రూ.23 కోట్ల నుంచి రూ.24 కోట్ల ఆదాయం పాస్ల రూపంలో వచ్చేది. ప్రస్తుతం రూ.15-16 కోట్లకు పడిపోయింది. దీనికి ప్రధాన కారణం పాఠశాలలు, కళాశాలలు నడకపోవడం. దీనితో పాటు లాక్డౌన్ల ప్రభావం, కరోనా భయంతో చాలా మంది సొంతంగా వాహనాలు కొనుక్కున్నారు. మెట్రో సౌకర్యం అందుబాటులోకి రావడం కూడా ఆర్టీసీ బస్పాస్లు తగ్గడంలో పాత్ర ఉంది.
కరోనా వల్ల బస్పాస్లు భారీగా తగ్గిపోయాయి. మాకు కలెక్షన్ సరిగా రావడం లేదు. జీతాలు కూడా సక్రమంగా అందడం లేదు. మొదటిదశ కొవిడ్ నుంచి కోలుకున్నామనుకునే సరికి రెండోదశ దెబ్బతీసింది. ఆర్టీసీ కండక్టర్.
ఇదీ చూడండి: VAJRA service: ప్రయాణికులు లేరని వజ్ర బస్సులు అమ్మేస్తారట..
సొంతవాహనాలకే మొగ్గు
గతేడాదిలో కొవిడ్ మొదటి దశ సమయంలో లాక్డౌన్ కారణంగా సుమారు ఏడు నెలల పాటు బస్సులు డిపో గేటు దాటలేదు. ఈ ఏడాది రెండోదశ సమయంలోను బస్సులు రోడ్డెక్కలేదు. బస్సులు అందుబాటులో లేకపోవడం వల్ల ప్రయాణికులు ప్రత్యామ్నాయాలపై దృష్టి పెట్టారు. చాలామంది సొంతంగా వాహనాలు కొనుక్కున్నారు. వాటితో పాటు ప్రైవేటు వాహనాల సంఖ్య పెరిగింది. దీనితో బస్పాస్లు కొనుక్కునేవారి సంఖ్య భారీగా తగ్గిపోయింది. విద్యార్థుల కోసమే గ్రేటర్ ఆర్టీసీ ప్రతి రోజూ 2,500పైగా ప్రత్యేక ట్రిప్పులు నడిపేదని ఆర్టీసీ అధికారులు పేర్కొంటున్నారు. ప్రస్తుతం ఆ సంఖ్య చాలా వరకు తగ్గిపోయిందని తెలిపారు.
లాక్డౌన్ సమయంలో బస్సులు ఉండవు. బస్పాస్ తీసుకుంటే ఆమొత్తం వృథా అవుతుంది. అందుకే బస్పాస్లు తీసుకునేవారి సంఖ్య తగ్గిపోయింది. వీలైతే సొంతంగా వాహనాలు కొనుక్కుంటున్నారు. లేకపోతే రోజువారి టికెట్ కొనుక్కుంటున్నారు. - సరస్వతి, ప్రయాణికురాలు.
ప్రస్తుతం విద్యార్థులు ఆన్లైన్ చదువులకు పరిమితమయ్యారు. చాలా వరకు విద్యాసంస్థలు ఆర్టీసీ గుర్తింపును రద్దుచేసుకున్నట్లు అధికారులు పేర్కొంటున్నారు. జీజీటీ ఆర్టీనరి పాస్కు రూ.950, మెట్రో పాస్కు రూ.1,070లు, స్టూడెంట్పాస్కు రూ.165, ఎన్జీఓ పాస్కు రూ.360 చొప్పున ఆర్టీసీ పాస్లు జారీ చేస్తుంది. గ్రేటర్ పరిధిలో సాధారణ బస్పాస్లు 3.5 లక్షల మంది వినియోగిస్తారని ఆర్టీసీ అధికారులు తెలిపారు.
కొవిడ్ ప్రభావం వల్ల బస్లలో ప్రయాణించేవారి సంఖ్య తగ్గిపోయింది. ఎక్కువమంది సొంతవాహనాల్లోనే వెళ్తున్నారు. ప్రస్తుతం మెట్రోకంటే ఆర్టీనరీ సర్వీసుల్లోనే కొంచెం నయం. బస్పాస్ల సంఖ్య భారీగా తగ్గిపోయింది. స్కూళ్లు, కాలేజీలు ఉంటే ఎక్కువ పాస్లు ఉండేవి. -శ్రీలత, ఆర్టీసీ కండక్టర్.
ఈదశలో కొవిడ్ మూడోదశ వార్తలు రావడం వల్ల బస్సులు ఎప్పుడు ఆగిపోతాయో అనే భయంతో బస్సుపాస్లు తీసుకునేవారు వెనకడుగు వేస్తున్నారు. రోజురోజుకు పాస్లు తీసుకునేవారి సంఖ్య తగ్గిపోతుంది. ఈ పరిస్థితి నుంచి గట్టేక్కే మార్గం కనిపించడం లేదు.
ఇదీ చూడండి: TSRTC: ఖాళీగా ఉంచడానికి వీలుకాదు.. వదులుకోడానికి మనసు రాదు
