'వెల్​నెస్​ కేంద్రాల ఔషధ అక్రమదారులపై చర్యలు చేపట్టాలి'

హైదరాబాద్​ ఆర్టీసీ క్రాస్​రోడ్డులోని సీపీఎం కార్యాలయంలో పార్టీ నేతలు సమావేశం ఏర్పాటు చేశారు. తెలంగాణలో 12 వెల్​నెస్​ కేంద్రాల్లో చోటుచేసుకున్న ఔషధాల అక్రమాలపై ప్రభుత్వం చర్యలు తీసుకోవాలని సీపీఎం నేతలు డిమాండ్​ చేశారు.

రాష్ట్రంలోని 12 వెల్​నెస్​ కేంద్రాల్లో జరిగిన అవినీతి అక్రమాలు- ప్రజాధనం వృథాపై విచారణ జరిపించాలని హైదరాబాద్​ ఆర్టీసీ క్రాస్​ రోడ్​లోని సీపీఎం నగర కార్యాలయంలో సీపీఎం కార్యకర్తలు డిమాండ్​ చేశారు. గతేడాది నవంబర్​ నెలలో ఖైరతాబాద్​ వెల్​నెస్​ సెంటర్​లో జరిగిన ఔషధ అక్రమాలను బహిర్గతం చేసినా ప్రభుత్వం ఎలాంటి చర్యలు తీసుకోకపోవడంలో ఆంతర్యం ఏమిటని పార్టీ నగర కార్యదర్శి శ్రీనివాస్​రెడ్డి ప్రశ్నించారు.

ఖైరతాబాద్ వెల్​నెస్​ కేంద్రంలో జరిగిన అక్రమాలపై విచారణ జరిగినట్లు కనిపించినా.. ఇప్పటికీ సంబంధిత అధికారులపై ఎలాంటి చట్టపరమైన చర్యలు చేపట్టలేదని శ్రీనివాస్​రెడ్డి విమర్శించారు. ప్రభుత్వ ఉద్యోగులు, ఉపాధ్యాయులు, పాత్రికేయుల సంఘాల ప్రతినిధులు వెల్​నెస్ సెంటర్ల అక్రమాలపై పోరాటం చేయాల్సిన అవసరముందని ఆయన అన్నారు. అక్రమాలపై ప్రభుత్వం ఇప్పటికైనా చర్యలు చేపట్టకపోతే.. ఆందోళనలను ఉద్ధృతం చేస్తామని హెచ్చరించారు.

ఇదీ చదవండిః గ్రేటర్​ డబుల్​ బెడ్ రూం ఇళ్ల కోసం రూ.600 కోట్లు విడుదల