రాష్ట్ర రాజధానిలో ప్రజా మరుగుదొడ్ల సమస్యను పరిష్కరించాలని రాష్ట్ర ప్రభుత్వం జీహెచ్‌ఎంసీకి రూ.65 కోట్ల నిధులు కేటాయించింది. 2 వేల చోట్ల మరుగుదొడ్లు ఏర్పాటు చేయగా.. నెల తిరగక ముందే అందులోని 50శాతం నిర్మాణాలు శిథిలావస్థకు చేరుకున్నాయి. ఇందుకు టెండరు విధానమే కారణమన్న ఆరోపణలొస్తున్నాయి. కేంద్ర కార్యాలయం వికేంద్రీకరణ పేరుతో జోనల్‌ కార్యాలయాలకు బాధ్యతలు అప్పగించి చేతులు దులిపేసుకుంది. దాని వల్ల ఒక్కో జోన్‌.. ఒక్కో రకం నిర్మాణాలను అందుబాటులోకి తెచ్చింది. కొన్ని చిన్నపాటి పాన్‌ డబ్బాల్లా, మరికొన్ని అట్టపెట్టెలతో కట్టిన పిట్టగూళ్లను తలపిస్తున్నాయి.
ఎక్కడైనా అంతే..
ఖైరతాబాద్‌, శేరిలింగంపల్లి జోన్లలో ప్లాస్టిక్‌ పీచుతో చేసినవి ఏర్పాటు చేయగా.. అవి విరుగుపోతున్నాయి. లోయర్‌ట్యాంక్‌బండ్‌లో ప్రతి 100మీటర్లకు ఓ మరుగుదొడ్డి ఏర్పాటు చేయగా, అవన్నీ ఇప్పటికే ధ్వంసమయ్యాయి. ఖైరతాబాద్‌ విద్యుత్తు సౌధ, ఉప్పల్‌, అత్తాపూర్‌, మెహిదీపట్నం, చార్మినార్‌, చాంద్రాయణగుట్ట, తదితర ప్రాంతాల్లో మరింత దుర్భర పరిస్థితి నెలకొంది.ఏటా నిర్వహణ రూపంలో ఖర్చు చేయనున్న రూ.40కోట్లు సైతం బూడిదలో పోసినట్లేనని విమర్శలొస్తున్నాయి.
వింత లెక్క..
జీహెచ్‌ఎంసీ గతంలో ఒక మరుగుదొడ్డిని ఒకటిగానే లెక్కించేది. ఇప్పుడు రెండుగా చెబుతోంది. ఎలాగంటే.. స్త్రీ, పురుషులకు వేర్వేరు సౌకర్యాలు ఉన్నందున, రెండు నిర్మాణాలుగా పరిగణిస్తామని అంటోంది. ఆ లెక్కన 2014 ప్రాంతాల్లో 4028 ప్రీ ఫ్యాబ్రికేటెడ్‌ టాయిలెట్లను ఏర్పాటు చేశామంటోంది.
ఇదీ చూడండి: ఆరోగ్యంపై దృష్టిపెట్టిన మహిళలు.. జిమ్లలో కసరత్తులు
