కరోనా వైరస్ గాలిలో దాదాపు 2 గంటల సేపు ఉంటుందని సీసీఎంబీ ప్రకటించింది. గతంలో మురుగునీటిలో వైరస్పై పరిశోధనలు చేసిన సీసీఎంబీ.. తాజాగా గాలిలో వైరస్ వ్యాప్తిపై పరిశోధించింది. హైదరాబాద్లోని 3 , చండీగఢ్లోని 3 ఆస్పత్రుల్లో గాలి శాంపిల్స్ను సేకరించిన సీసీఎంబీ శాస్త్ర వేత్తలు... వాటికి ఆర్టీపీసీఆర్ పరీక్షలు నిర్వహించారు.
లక్షణాలు ఉన్న వైరస్ బాధితుల ద్వారా గాలిలోకి వైరస్ చేరుతుందని గుర్తించారు. లక్షణాలు ఉండి, రోగులు ఒకే గదిలో ఎంతసేపు ఉన్నారు అన్న దానిపై ఆధారపడి వైరస్ వ్యాప్తి ఉంటుందని ప్రకటించారు. గాలిలో వైరస్ సుమారు 2 మీటర్ల దూరం, 2 గంటల పాటు ఉంటుందని గుర్తించారు. అయితే లక్షణాలు లేని వారి ద్వారా గాలిలోకి వైరస్ చేరదని పేర్కొన్నారు. ఆస్పత్రుల్లో కొవిడ్, నాన్ కొవిడ్ సేవలకు వేరు వేరు వార్డులను కేటాయించి చికిత్సలు అందిస్తోండటం ఉపయోగపడుతోందన్నారు. మాస్క్ ల వినియోగం ద్వారా గాలిలో ఉన్న వైరస్ ద్వారా ఇన్ఫెక్షన్ వ్యాప్తి చెందకుండా చూసుకోవచ్చని స్పష్టం చేశారు.
ఇదీ చదవండి: ఈ నెల 13నే భారత్లో వ్యాక్సినేషన్ షురూ!
