జంట న‌గ‌రాల్లో కరోనా విజృంభిస్తోంది. కేవ‌లం జీహెచ్ఎంసీ ప‌రిధిలోనే రోజూ వందపైనే కేసులు న‌మోద‌వుతున్నాయి. ప్రధానంగా అంబర్పేట్, రాంన‌గ‌ర్ వంటి ప్రాంతాల్లో కేసులు క‌ల‌కలం రేపుతున్నాయి. పాజిటివ్ కేసులు నమోదవుతున్న ప్రాంతాలను కూడా కంటైన్మెంట్ జోన్లుగా చేయడం లేదని న‌గ‌రవాసులు ఆందోళ‌న వ్యక్తం చేస్తున్నారు.
మేయర్కు వైద్య పరీక్షలు
జీహెచ్ఎంసీ మేయర్ బొంతు రామ్మోహన్కు వైద్యులు మరోసారి కరోనా పరీక్షలు నిర్వహించారు. గురువారం మేయర్ డ్రైవర్కు కరోనా సోకినట్లు నిర్ధరణ కావడం వల్ల.. మేయర్ నుంచి వైద్యులు శాంపిల్స్ తీసుకున్నారు. గతంలో మేయర్ టీ తాగిన హోటల్లో మాస్టర్కు కరోనా రావడం వల్ల.. 10 రోజుల క్రితం బొంతు రామ్మోహన్కు పరీక్షలు నిర్వహించగా నెగిటివ్ వచ్చింది.
పోలీసులకు..
బంజారాహిల్స్ పోలీస్ స్టేషన్లో ఏఎస్‌ఐ సహా ఐదుగురికి కరోనా నిర్ధరణ అయింది. ఇందులో ఇద్దరు కానిస్టేబుళ్లు, ఇద్దరు హోంగార్డులు ఉన్నారు. బంజారాహిల్స్ పోలీస్‌స్టేషన్‌లో ఇప్పటివరకు 15 కరోనా కేసులు నమోదయ్యాయి. ఎస్‌ఆర్‌నగర్ పోలీస్‌స్టేషన్‌లో నలుగురికి కరోనా నిర్ధరణ అయింది. ఎస్‌ఐ, ఇద్దరు కానిస్టేబుళ్లు, హోంగార్డు కొవిడ్ బారిన పడ్డారు. చికిత్స నిమిత్తం వీరిని నేచర్ క్యూర్ ఆస్పత్రికి వైద్యాధికారులు తరలించారు.
పలు ప్రాంతాల్లో కరోనా విజృంభణ
హిమాయత్నగర్లోని వాసవి స్కూల్ సమీపంలోని ఓ అపార్ట్మెంట్లో తండ్రీకుమారులకు కరోనా సోకినట్లు నిర్ధరణ అయింది. ప్రస్తుతం వీరిద్దరు యశోద ఆస్పత్రిలో చికిత్స పొందుతున్నారు. సాగర్రింగ్ రోడ్డులోని ఓ టవర్స్లో ఓ సాఫ్ట్వేర్ ఇంజనీర్ కొవిడ్-19 వైరస్ బారినపడ్డాడు. గాంధీలో చికిత్స అందిస్తున్నారు. అతని ఇంట్లోని ఆరుగురు కుటుంబ సభ్యులను క్వారంటైన్లో ఉంచారు. సికింద్రాబాద్ మారేడ్ప‌ల్లిలోని చికెన్ సెంటర్ నిర్వహిస్తున్న ఓ వ్యక్తికి వైరస్ పాజిటివ్గా తేలింది. కొండాపూర్ ఏరియా హాస్పిటల్ సూపరింటెండెంట్కు కరోనా సోకింది. సికింద్రాబాద్ బోయిన్పల్లిలోని ధనలక్ష్మి కాలనీకి చెందిన ఓ కూరగాయల వ్యాపారి కరోనాతో మృతి చెందారు.
అంబర్పేట పరిధిలో
కుత్బుల్లాపూర్ నియోజకవర్గంలో ఇప్పటి వరకు 61 కేసులు నమోదయ్యాయి. వైరస్ బారిన పడి ముగ్గురు మరణించారు. అంబర్పేట నియోజకవర్గ పరిధిలో శుక్రవారం 10 కరోనా పాజిటివ్ కేసులు నమోదయ్యాయి. బాగ్ అంబర్పేట్లోని తురబ్నగర్లో అధికంగా నాలుగు కేసులు నమోదయ్యాయి. వడ్డెర బస్తీకి చెందిన ఒకరు కరోనాతో మరణించారు. గోల్నాకలో ఒకరు, అంబర్పేట్ పరిధిలో కరోనా బారిన పడి ఇద్దరు మృతిచెందారు. తురాబ్నగర్లో మొత్తం నలుగురు కరోనా బారినపడ్డారు. పటేల్నగర్లో ఓ వృద్దుడు, ప్రేమ్నగర్లో క్లాత్ సెంటర్ నిర్వహించే వ్యక్తికి, మారుతీనగర్లో మరొక వ్యక్తికి, అన్నపూర్ణ నగర్లోని మరొక వృద్ధుడికి పాజిటివ్ నిర్ధరణ అయింది.
ఇదీ చూడండి : రాష్ట్రంలో కొత్తగా 164 కరోనా పాజిటివ్ కేసులు
