సీఎం కేసీఆర్ ఆర్టీసీపై సమీక్ష నిర్వహించారు. ఆర్టీసీ నష్టాల్లో కొనసాగుతోందని అధికారులు సీఎంకు తెలిపారు. ఇంధన ధరలు, లాక్‌డౌన్‌, బకాయిల వల్లే ఆర్టీసీలో నష్టాలొస్తున్నాయని వివరించారు. ఉద్యోగుల జీతాలు పెంచితే పెనుభారం తప్పదని కేసీఆర్కు చెప్పారు. ప్రభుత్వమే ఆర్టీసీకి సాయం అందించాలన్నారు. బస్సు ఛార్జీలు పెంచాలన్నారు. ఈ రెండు చర్యలు తీసుకుంటే తప్ప ఆర్టీసీ గట్టెక్కే పరిస్థితిలేదని చెప్పారు.
గతంలో బస్సు ఛార్జీలు పెంచినప్పుడు లీటర్ డీజిల్ ధర 67 రూపాయలు ఉండేదని, స్వల్ప వ్యవధిలోనే ధర లీటర్కు 15 రూపాయలు పెరిగిందని వివరించారు. డీజిల్ ధర పెంపు ఆర్టీసీపై తీవ్ర ప్రభావం చూపిందని, ఆర్థిక భారాన్ని మోపిందని చెప్పారు. కరోనా కారణంగా విధించిన లాక్ డౌన్ సమయంలోనూ సంస్థ నష్టాలను చవిచూసిందన్న అధికారులు... ఇప్పటికే పేరుకు పోయిన బకాయిల భారం ఉందని వివరించారు. ఏపీకి బస్సులు తిప్పడం వల్ల మంచి ఫలితం వచ్చిందన్నారు. ఆక్యుపెన్సీ 58 శాతానికి చేరిందని, ఆక్యుపెన్సీ క్రమంగా పెరుగుతోందని వివరించారు.
రోజుకు తొమ్మిది కోట్ల రూపాయల ఆదాయం సమకూరుతోందని, రానున్న రోజుల్లో పరిస్థితి మరింత ఆశాజనకంగా ఉంటుందని వివరించారు. ఆర్టీసీలో కార్గో సేవలు విజయవంతం అయ్యాయని, ప్రజలకు గొప్ప సేవలు అందిస్తున్నారని ముఖ్యమంత్రి కేసీఆర్ అధికారులను అభినందించారు. కార్గో ద్వారా 17లక్షల 72 వేల పార్సిళ్లను గమ్యానికి చేర్చడంతో 22 కోట్ల 61 లక్షల ఆదాయం వచ్చిందని అన్నారు. ప్రజలు కూడా ఆర్టీసీ కార్గో సేవల పట్ల ఎంతో సంతృప్తిగా ఉన్నారన్న సీఎం... కార్గో సేవల ప్రత్యేకాధికారి కృష్ణకాంత్ను ప్రశంసించారు.
ఆర్టీసీ ద్వారా పంపిన పార్సిళ్లు సకాలంలో, సురక్షితంగా గమ్యం చేరుతాయన్న నమ్మకం ప్రజల్లో ఏర్పడిందని అన్నారు. ఓవైపు మారుమూల ప్రాంతాలకు మరోవైపు నగరంలోని ఇంటింటికి డోర్ డెలివరీ చేయడం అభినందనీయమన్నారు. ఇదే స్ఫూర్తితో ప్రజలు, ప్రయాణికులకు సేవలు అందించాలని సీఎం కేసీఆర్ పిలుపునిచ్చారు. ఈ సమీక్షలో మంత్రి పువ్వాడ అజయ్, ఆర్టీసీ ఉన్నతాధికారులు పాల్గొన్నారు.
ఇదీ చదవండి: నల్గొండ జిల్లాలో ఘోర ప్రమాదం.. ఏడుగురు దుర్మరణం
