ధాన్యం, బియ్యం గింజల ప్రమాణాల విషయంలో కేంద్రం వెనక్కు తగ్గింది(central government has not changed to the grain and rice standards). మునుపటి ప్రమాణాలే ప్రస్తుత వానాకాలంలోనూ అమలులో ఉంటాయని కేంద్ర ఆహార, ప్రజాపంపిణీ, వినియోగదారుల వ్యవహారాల మంత్రిత్వ శాఖ సోమవారం ఉత్తర్వులు జారీ చేసింది. వివిధ వర్గాల నుంచి వచ్చిన ఒత్తిడి నేపథ్యంలో ఈ నిర్ణయం తీసుకుంది. ప్రజలకు నాణ్యమైన బియ్యం అందజేసేందుకు ప్రస్తుతం అమలులో ఉన్న ప్రమాణాల్లో మార్పులు చేస్తూ కేంద్రం గడిచిన నెలలో రాష్ట్రాలకు మార్గదర్శకాలను జారీ చేసింది. వీటివల్ల ఇటు రైతులు, అటు మిల్లర్లకు తీవ్ర ఇబ్బందులు ఎదురవుతాయంటూ ప్రధానమంత్రి నరేంద్రమోదీకి (pm modi) పంజాబ్‌ అప్పటి ముఖ్యమంత్రి అమరీందర్‌సింగ్‌ లేఖ కూడా రాశారు. తెలంగాణ ప్రభుత్వం సైతం అసంతృప్తి వ్యక్తం చేసింది.
తేమ 17 శాతమే
తాజాగా క్వింటా ధాన్యంలో తేమ 17 శాతం వరకు అనుమతిస్తున్నట్లు కేంద్రం ఆ ఉత్తర్వుల్లో స్పష్టం చేసింది. ధాన్యంలో తాలును రెండు శాతం వరకు అనుమతించింది. బియ్యంలో నూకలు కూడా 25 శాతం వరకు అనుమతిస్తున్నట్లు పేర్కొంది. ‘గతంలో జారీ చేసిన ఉత్తర్వులను కేంద్రం ఉపసంహరించుకోవటంతో రైతులకు మేలు జరుగుతుంది’ అని తెలంగాణ రైస్‌ మిల్లర్స్‌ అసోసియేషన్‌ అధ్యక్షుడు గంపా నాగేందర్‌ సంతృప్తి వ్యక్తం చేశారు.
ఉప్పుడు బియ్యంపై అధికారుల చర్చలు
మరోపక్క ఉప్పుడు బియ్యం వ్యవహారం ఇంకా కేంద్ర, రాష్ట్ర ప్రభుత్వాల మధ్య నలుగుతూనే ఉంది (not clarity on boiled rice). మంగళవారానికి స్పష్టత వచ్చే అవకాశం ఉన్నట్లు సమాచారం. గత యాసంగికి సంబంధించి 24.75 లక్షల మెట్రిక్‌ టన్నుల ఉప్పుడు బియ్యం మాత్రమే తీసుకుంటామని కేంద్రం చెబుతుండగా కనీసం 50 లక్షల మెట్రిక్‌ టన్నులైనా తీసుకోవాలని రాష్ట్ర ప్రభుత్వం కోరుతున్న విషయం విదితమే. ఈ విషయమై పౌరసరఫరాల శాఖ కమిషనర్‌ వి.అనిల్‌కుమార్‌ నేతృత్వంలోని రాష్ట్ర అధికారుల బృందం సోమవారం దిల్లీ వెళ్లింది. ఆహార, ప్రజా పంపిణీ, వినియోగదారుల వ్యవహారాల మంత్రిత్వ శాఖతో పాటు ఎఫ్‌సీఐ అధికారులతో విస్తృతంగా సంప్రదింపులు నిర్వహించింది. సాయంత్రం వరకు వ్యవహారం కొలిక్కి రాలేదు. మంగళవారం కూడా అధికారుల మధ్య చర్చలు జరగనున్నాయి.
ఇదీ చూడండి: ధాన్యం సేకరణలో ఎఫ్‌సీఐ ఆంక్షలు.. రాష్ట్రానికి వేలకోట్ల నష్టం
