తెలంగాణ పబ్లిక్ సర్వీస్ కమిషన్ నిరుద్యోగుల జీవితాలతో చెలగాటమాడుతోందని.. ఇదే వైఖరిని అవలంభిస్తే.. లక్షలాది మంది నిరుద్యోగులతో కమిషన్ను ముట్టడిస్తామని బీసీ సంఘం జాతీయాధ్యక్షుడు ఆర్ కృష్ణయ్య హెచ్చరించారు.
టీఎస్పీఎస్సీ విడుదల చేసిన టీఆర్టీ-2017 నోటిఫికేషన్ హిందీ భాషా పండిట్ తుది ఫలితాలను విడుదల చేయాలని.. తెలంగాణ నిరుద్యోగ ఐకాస ఆధ్వర్యంలో అభ్యర్థులు నాంపల్లిలోని టీఎస్పీఎస్సీ కార్యాలయాన్ని ముట్టడించారు. నిరుద్యోగ ఐకాస ఛైర్మన్ నీల వెంకటేష్ అధ్యక్షతన కృష్ణయ్య, అభ్యర్థులు కమిషన్ కార్యాలయం గేటు ముందు బైఠాయించి రాష్ట్ర ప్రభుత్వానికి, అధికారులకు వ్యతిరేకంగా నినాదాలు చేశారు.
తెలంగాణ ఏర్పడిన తర్వాత ఉపాధ్యాయుల నియామకాల కోసం టీఆర్టీ-2017 పేరుతో టీఎస్పీఎస్సీ నోటిఫికేషన్ విడుదల చేసిందని కృష్ణయ్య తెలిపారు. ఈ నోటిఫికేషన్లో అన్ని భాషల ఉపాధ్యాయుల ఫలితాలు విడుదల చేశారని... అభ్యర్థులు ఉద్యోగాల్లో కూడా చేరారని వివరించారు. కానీ హిందీ లాంగ్వేజ్ పండిట్కు సంబంధించిన 342 పోస్టుల ఫలితాలను నాలుగేళ్లు గడుస్తున్నా.. నేటికీ ప్రకటించకపోవడం దారుణమన్నారు.
టీఎస్పీఎస్సీ నిర్లక్ష్యం కారణంగా అభ్యర్థులు తీవ్ర ఇబ్బందులు పడుతున్నారని ఆవేదన వ్యక్తం చేశారు. అర్హులైన అభ్యర్థులతో పోస్టులను భర్తీ చేసేంత వరకు తమ పోరాటం కొనసాగిస్తామని ఆయన డిమాండ్ చేశారు.
ఇదీ చూడండి: రాష్ట్రానికి మరోసారి స్కోచ్‌ అవార్డులు.. ఉత్తమ మంత్రిగా కేటీఆర్
