సికింద్రాబాద్ ఉజ్జయిని మహంకాళి అమ్మవారి(Lashkar Bonalu) బోనాల వేడుక వైభవోపేతంగా కొనసాగుతోంది. భాజపా రాష్ట్ర అధ్యక్షుడు బండి సంజయ్(bandi sanjay).. అమ్మవారిని దర్శించుకున్నారు. రాష్ట్ర ప్రజలకు బండి సంజయ్ బోనాల పండుగ శుభాకాంక్షలు తెలియజేశారు. ప్రజలంతా సుఖశాంతులతో ఉండాలని అమ్మవారిని వేడుకున్నట్లు చెప్పారు. కరోనా మహమ్మారి నుంచి ప్రజలను కాపాడాలని కోరుకున్నారు.
మహిళలు అమ్మవారికి బోనం సమర్పించడం ద్వారా తల్లి దీవెనలు మనకు ఉంటాయని సంజయ్ అన్నారు. లష్కర్ బోనాల సందర్భంగా అమ్మవారిని దర్శించుకోవడం సంతోషంగా ఉందని చెప్పారు. అమ్మవారి కరుణాకటాక్షాలు తెలంగాణ ప్రజలందరిపై ఉండాలని ఆకాంక్షించారు. అనంతరం రాష్ట్రంలో తెరాస పాలనపై బండి సంజయ్ విమర్శలు గుప్పించారు.
ఎన్నికలొస్తేనే రాష్ట్ర ముఖ్యమంత్రి ఫామ్హోస్ నుంచి బయటికొస్తారు. సమావేశాలు పెట్టి లేనిపోని హామీలు ఇస్తారు. కులాలు, మతాలు, వర్గాల పేరిట సమాజాన్ని చీల్చే ప్రయత్నం చేస్తున్నారు. అలాంటి వారికి మంచి ఆలోచన కలిగించాలని అమ్మవారిని కోరుకుంటున్నాను. -బండి సంజయ్, భాజపా రాష్ట్ర అధ్యక్షుడు
రాష్ట్రంలో పరిపాలన సౌలభ్యం, పరిపాలకులు నీతి, నిజాయతీతో ఉంటే ప్రజలకు ఏ కష్టాలు ఉండవని బండి అభిప్రాయపడ్డారు. కానీ దైవ భక్తుడనని చెప్పుకునే సీఎం కేసీఆర్.. ఫామ్హౌస్కే పరిమితమై ప్రజలను పట్టించుకోవడం లేదని మండిపడ్డారు. ఎన్నికలొస్తేనే ఫామ్హోస్ నుంచి బయటకొస్తారని వ్యంగ్యాస్త్రాలు విసిరారు. హైదరాబాద్లో సమావేశాలు పెట్టి అవాకులు చెవాకులు మాట్లాడి.. లేనిపోని హామీలు ఇస్తారని ఎద్దేవా చేశారు. కులాలు, వర్గాలు పేరిట సమాజాన్ని చీలుస్తారని ఆగ్రహం వ్యక్తం చేశారు. అలాంటి వారి మనసు మార్చి రాష్ట్రంలో మంచి పరిపాలన ఉండేలా చేయాలని అభిప్రాయపడ్డారు.
ఇదీ చదవండి: Lashkar Bonalu : లష్కర్ బోనాలు.. పోటెత్తిన భక్తులు.. ప్రముఖుల సందర్శనలు
