ప్రభుత్వాన్ని ప్రశ్నిస్తే కేసులుపెట్టడం, దాడులకు పాల్పడటం తగదని భాజపా రాష్ట్ర అధ్యక్షుడు బండి సంజయ్ హితవు పలికారు. తెరాస కార్యకర్తల దాడిలో గాయపడిన సూర్యాపేట జిల్లాకు చెందిన ఉస్మానియా లా విద్యార్థి సురేశ్ యాదవ్ను హైదరాబాద్లోని ఓ ప్రైవేట్లో ఆస్పత్రిలో పరామర్శించారు. ప్రభుత్వాన్ని ప్రశ్నించడమే విద్యార్థులు చేసిన తప్పా అని ప్రశ్నించారు.
తెలంగాణ ఉద్యమానికి ఊపిరి పోసిన గడ్డ ఉస్మానియా విశ్వవిద్యాలయం అని బండి సంజయ్ పేర్కొన్నారు. ఎంతో మంది విద్యార్థులు బలిదానాల ఫలితమే తెలంగాణ అని వ్యాఖ్యానించారు. రాష్ట్రం ఎవరి వల్ల వచ్చిందో ముఖ్యమంత్రి కేసీఆర్ ఒకసారి ఆలోచించాలన్నారు. సురేష్‌యాదవ్‌పై దాడి చేసిన వారిని వెంటనే అరెస్ట్‌ చేయాలని ఆయన డిమాండ్‌ చేశారు. ముఖ్యమంత్రి కేసీఆర్ రాష్ట్రంలో గుండాలను పెంచి పోషిస్తున్నారని మండిపడ్డారు. సురేశ్ యాదవ్పై 25 మంది గుండాలు దాడి చేస్తే సీఎం కేసీఆర్ స్పందించరా భాజపా రాష్ట్ర అధ్యక్షుడు ప్రశ్నించారు.
తెలంగాణ ఉద్యమానికి ఊపిరి పోసిన గడ్డ ఉస్మానియా యూనివర్సిటీ. ఉద్యమంలో విద్యార్థులదే కీలకపాత్ర. ప్రశ్నించిన వారిపై దాడులు చేస్తారా? ఓ విద్యార్థి నాయకునిపై దాడి చేసినా కూడా ముఖ్యమంత్రికి సోయిలేదు. కనీసం స్పందించరు. ఉద్యమ నాయకుడైన సురేశ్ యాదవ్పై రెండోసారి అటాక్ జరిగింది. ఆయనకు వ్యాపారం లేదు, ఉద్యోగం లేదు. ప్రభుత్వాన్ని ప్రశ్నించిన వారిపైనే వ్యతిరేకంగా కేసులు పెడుతున్నారు. రాష్ట్రంలో శాంతి భద్రతలు కాపాడే బాధ్యత ఈ ముఖ్యమంత్రికి లేదా? ఒక లా విద్యార్థిపై ఇలా దాడులు చేస్తే ఇక ప్రజల ప్రాణాలకు భరోసా ఎక్కడ? సురేశ్ యాదవ్ను దాడి చేసిన వారిపై కేసులు పెట్టకుండా బాధితులపైనే నమోదు చేస్తారా? -బండి సంజయ్, భాజపా రాష్ట్ర అధ్యక్షుడు
ఇదీ చూడండి: Bandi Sanjay: 'కేసీఆర్ డ్రామాలకు చెల్లు.. హుజూరాబాద్ వేదికగానే ఆ యుద్ధం మొదలవనుంది'
