కేసీఆర్ వ్యవహారం చూస్తే యావత్ తెలంగాణ తలదించుకుంటోందని భాజపా రాష్ట్ర అధ్యక్షుడు, ఎంపీ బండి సంజయ్ పేర్కొన్నారు. సీఏఏకి వ్యతిరేకంగా అసెంబ్లీలో తీర్మానం చేయండపై భాజపా ఎంపీలు దిల్లీలోని తెలంగాణ భవన్ అంబేడ్కర్ విగ్రహం వద్ద మౌనదీక్ష చేపట్టారు. సీఏఏ వ్యతిరేకంగా చేసిన తీర్మానాన్ని రద్దు చేయాలని భాజపా నేతలు డిమాండ్ చేశారు.
వాస్తవాలు తెలుసుకోకుండా కేసీఆర్ వ్యవహరిస్తున్నారని ఎంపీ బండి సంజయ్ మండిపడ్డారు. దేశంలోని ముస్లింలకు ఎలాంటి నష్టం లేదని చెప్పారు. ముస్లింలు వేరే దేశం నుంచి వస్తే... దేశంలోని ముస్లింల పొట్టకొట్టినట్లేనని వెల్లడించారు. ముస్లిం ఓట్ల కోసమే సీఏఏ వ్యతిరేక తీర్మానం చేశారని ఆరోపించారు. కేసీఆర్ అయినా.. ఒవైసీ అయినా ఎన్పీఆర్లో నమోదు చేయించుకోవాల్సిందేనని స్పష్టం చేశారు. దేశం గురించి ఆలోచించే సమయం కేసీఆర్కు ఎక్కడుందని ఎద్దేవా చేశారు.
రైతులు, విద్యార్థులు, ఆర్టీసీ ఉద్యోగులు ఆత్మహత్యలు చేసుకుంటే కేసీఆర్ పట్టించుకోలేదన్నారు. సీఏఏ, ఎన్పీఆర్ అమలు జరిగి తీరుతుందని ప్రకటించారు. అసెంబ్లీ చేసిన తీర్మానం చెత్తబుట్టకే పరిమితమని వ్యాఖ్యానించారు.
ఇదీ చూడండి: ఆర్బీఐ అభయంతో లాభాల్లో స్టాక్ మార్కెట్లు
