పాలమూరు ప్రజలను సీఎం మోసం చేస్తున్నారు: డీకే అరుణ

పాలమూరు ప్రజలను ముఖ్యమంత్రి కేసీఆర్‌ మోసం చేస్తున్నారని భాజపా జాతీయ ఉపాధ్యక్షురాలు డీకే అరుణ ఆరోపించారు. పాలమూరు-రంగారెడ్డి ప్రాజెక్టు ప్రారంభించి సంవత్సరాలు గడిచినా.. భూ నిర్వాసితులకు పరిహారం చెల్లించలేదని విమర్శించారు. ఇప్పుడు సంవత్సరంలోగా ప్రాజెక్టు పనులను ఎలా పూర్తి చేస్తారో చెప్పాలని ప్రశ్నించారు.

ముఖ్యమంత్రి కేసీఆర్​పై భాజపా జాతీయ ఉపాధ్యక్షురాలు డీకే అరుణ విమర్శలు గుప్పించారు. ఉమ్మడి పాలమూరు జిల్లాపై ముఖ్యమంత్రి మరోసారి దొంగ ప్రేమ కనబరుస్తున్నారని ధ్వజమెత్తారు. పాలమూరు-రంగారెడ్డి ప్రాజెక్టుతో ఉమ్మడి మహబూబ్‌నగర్, రంగారెడ్డి జిల్లాలకు ఈ ఏడాది వంద శాతం నీరు అందిస్తామంటున్న కేసీఆర్​.. ఇప్పటి వరకూ పాలమూరు-రంగారెడ్డి భూ నిర్వాసితులకు పరిహారం చెల్లించలేదని విమర్శించారు. ఇంకెన్నాళ్లు ఇలాంటి మాటలు చెబుతారని నిలదీశారు.

ఉమ్మడి పాలమూరు రైతులను కేసీఆర్ మోసం చేస్తున్నారని అరుణ ఆరోపించారు. నెట్టెంపాడు, కల్వకుర్తి, భీమా ప్రాజెక్టుల్లో పెండింగ్ పనులను త్వరగా పూర్తి చేయాలని డిమాండ్ చేశారు.