BJP Focus on Telangana Election 2023 : తెలంగాణలో గెలుపే లక్ష్యంగా బీజేపీ(BJP) వ్యూహాలను రచిస్తోంది. అందులో భాగంగా ఆ పార్టీ గెలుపు 23తో మొదలవ్వాలని పార్టీ అధినాయకత్వం పక్కా ప్రణాళికతో ముందుకు దూసుకుపోతోంది. 2018 అసెంబ్లీ ఎన్నికల్లో గోషామహల్ స్థానంలో మాత్రమే కమలం పార్టీ విజయం సాధించింది. ఆ తర్వాత జరిగిన లోక్సభ ఎన్నికల్లో మాత్రం 20 అసెంబ్లీ నియోజకవర్గాల్లో ఆధిక్యాన్ని సాధించి.. ఏకంగా నాలుగు ఎంపీ స్థానాలనూ కైవసం చేసుకుంది. తర్వాత జరిగిన అసెంబ్లీ ఉపఎన్నికల్లో(Telangana BY Elections) దుబ్బాక, హుజూరాబాద్ స్థానాల్లో గెలిచింది. ప్రస్తుతం జరిగే ఎన్నికల్లో మాత్రం 23 స్థానాల్లో తప్పనిసరిగా గెలుపు జెండా ఎగురవేయాలని కాషాయ పార్టీ తహతహలాడుతోంది.
Telangana BJP Election Strategy : గత లోక్సభ ఎన్నికల్లో ఆధిక్యం సాధించిన చోట్ల పట్టు నిలుపుకొనేందుకు బీజేపీ కేంద్ర నాయకత్వం ప్రత్యేక దృష్టి సారించింది. అప్పుడు వచ్చిన ఆధిక్యతను గెలుపుగా మార్చుకునేందుకు క్షేత్రస్థాయిలో ప్రణాళిక(BJP Election Plan)ను రూపొందించి.. అమలు చేస్తోంది. పార్లమెంటు ఎన్నికల్లో అమలు చేసిన బూత్ స్థాయి వ్యూహాన్నే.. బీజేపీ నేతలు పాటిస్తున్నారు.
అందులో భాగంగా ఆయా సెగ్మెంట్లలో ప్రతి ఓటరును కలవడం, కేంద్రం ఆధ్వర్యంలో జరిగిన ప్రగతిని వివరించడమే లక్ష్యంగా పెట్టుకున్నారు. వీటిపై ఎప్పటికప్పుడు విశ్లేషణలు చేస్తున్నారు. అభ్యర్థుల ఎంపిక విషయం, ఇంకా అనేక అంశాలపై ప్రత్యేక కార్యాచరణను రూపొందించారు. వీటితో పాటు వీటికి ఆనుకుని ఉన్న స్థానాలను కవర్ చేసేలా జాతీయ నేతలు ప్రచారానికి(BJP Central Leaders Campaign) అధిక ప్రాధాన్యత ఇస్తున్నారు. ఇలా చేస్తూ అక్కడి పరిస్థితులను ఎప్పటికప్పుడు తెలుసుకుంటూ రాష్ట్ర నాయకత్వానికి అవసరమైన సూచనలు అందిస్తున్నారు.
కీలకంగా మారిన ఆ లోక్సభ నియోజకవర్గాలు :
- గత కరీంనగర్ లోక్సభ నియోజకవర్గం పరిధిలోని కరీంనగర్, వేములవాడ, చొప్పదండి, మానకొండూరులలో బీజేపీ స్పష్టమైన ఆధిక్యం సాధించింది. ఇక్కడ ఎంపీగా గెలిచిన బండి సంజయ్.. ఆ తర్వాత రాష్ట్ర అధ్యక్షుడు అయి.. ఇప్పుడు కరీంనగర్ ఎమ్మెల్యే అభ్యర్థిగా బరిలోకి దిగారు. వేములవాడలో వికాస్ రావుకు, చొప్పదండిలో బొడిగె శోభ, మానకొండూరులో మోహన్కు బీజేపీ అధినాయకత్వం టికెట్లు ఇచ్చింది.
- ఆదిలాబాద్ లోక్సభ నియోజకవర్గ పరిధిలోని ఆదిలాబాద్, నిర్మల్, బోథ్, ముథోల్లో ఆధిక్యం సంపాదించింది. ఇక్కడే గెలిచిన ఎంపీ సోయం బాపురావును ఇప్పుడు బోథ్ ఎమ్మెల్యేగా, నిర్మల్ నుంచి మహేశ్వర్రెడ్డి, ముథోల్ నుంచి రామారావును పోటీలోకి దింపింది. ఆదిలాబాద్లో గత ఎన్నికల అభ్యర్థి పాయల్ శంకర్ను సైతం బరిలోకి నిలిపింది.
- అలాగే నిజామాబాద్ లోక్సభ నియోజకవర్గంలోని కోరుట్ల, నిజామాబాద్ గ్రామీణం, బాల్కొండ, ఆర్మూరు అసెంబ్లీ నియోజకవర్గాల పరిధిలో బీజేపీ ఆధిక్యం సాధించగా.. ఎంపీగా ధర్మపురి అర్వింద్ గెలిచారు. అయితే ప్రస్తుతం ఆయణ్ను కోరుట్ల నుంచి పోటీలో నిలుపుతున్నారు. ఆర్మూరులో రాకేశ్రెడ్డి, బాల్కొండలో అన్నపూర్ణమ్మ, నిజామాబాద్ గ్రామీణంలో దినేశ్ కుమార్లను పోటీలో ఉంచారు.
- మరోవైపు సికింద్రాబాద్ ఎంపీగా గెలిచిన కిషన్రెడ్డి కేంద్ర మంత్రి పదవి పొందారు. అప్పటి సార్వత్రిక ఎన్నికల్లో జీహెచ్ఎంసీ పరిధిలోని అంబర్పేట, ఖైరతాబాద్, సికింద్రాబాద్, సనత్నగర్, ముషీరాబాద్ నియోజకవర్గాల్లో స్పష్టమైన ఆధిక్యం సాధించింది. అలాగే గోషామహల్లో పూర్తిస్థాయిలో ఆధిక్యతను బీజేపీ దక్కించుకుంది. ఈసారి కూడా అవే ఫలితాలు రావాలని పార్టీ ముఖ్య నేతలు కిషన్ రెడ్డి, కె.లక్ష్మణ్ స్వయంగా రంగంలోకి దిగారు.
- మహబూబ్నగర్ పార్లమెంటు పరిధిలో కూడా బీజేపీ ఆధిక్యం సాధించింది. మహబూబ్నగర్, మక్తల్లో అప్పట్లో పార్టీ మంచిగానే రాణించింది. ఆ పట్టును నిలుపుకునేందుకు జలంధర్రెడ్డి, మిథున్రెడ్డిలకు టికెట్లు ఇచ్చి రంగంలోకి దించింది.
కీలకంగా మారనున్న ఆ మూడు నియోజకవర్గాలు : ప్రస్తుతం గోషామహల్, దుబ్బాక, హుజూరాబాద్లో మళ్లీ అధికారాన్ని నిలుపుకునేందుకు బీజేపీ వ్యూహాలను రచిస్తోంది. దుబ్బాక టికెట్ బీజేపీ అధిష్ఠానం ప్రకటించకముందు నుంచి రఘునందనరావు తన ప్రచారాన్ని కొనసాగించారు. హుజూరాబాద్లో వరుసగా గెలుచుకుని వస్తున్న.. బీజేపీ రాష్ట్ర ఎన్నికల నిర్వహణ కమిటీ అధ్యక్షుడు ఈటల రాజేందర్ గెలుపునకు వ్యూహాలను అమలు చేస్తున్నారు. అలాగే సీఎం కేసీఆర్ను గజ్వేల్లో ఢీ కొట్టేందుకు రెడీ అయ్యారు. మరోవైపు గోషామహల్ నుంచి రాజాసింగ్ మూడోసారి గెలిచేందుకు పక్కా ప్రణాళికను సిద్ధం చేసి.. ముందుకు వెళ్తున్నారు. ఈ మూడు స్థానాలు బీజేపీకి కీలకంగా మారనున్నాయి.
అధికార పార్టీ లోపాలే అస్త్రాలుగా చేసుకుని ప్రతిపక్ష పార్టీల ప్రచారాలు
