ప్రమాదం జరిగిన గంటలోనే... మెరుగైన చికిత్స

రోడ్డు ప్రమాదాల్లో మరణాల తగ్గింపునకు పోలీసు శాఖ కసరత్తు చేస్తోంది. ప్రమాదం జరిగిన మొదటి గంటలోపే క్షతగాత్రులకు మెరుగైన చికిత్స అందించేందుకు ప్రణాళికలు సిద్ధం చేస్తోంది.

రోడ్డు ప్రమాదాల్లో మరణాలను తగ్గించేందుకు పోలీసు శాఖ ప్రణాళిక రూపొందిస్తోంది.‘గోల్డెన్‌ అవర్​లోపే క్షతగాత్రులకు మెరుగైన చికిత్స అందించేందుకు అవసరమైన సాంకేతిక పరిజ్ఞానాన్ని సిద్ధం చేస్తోంది. త్వరలోనే రాష్ట్రవ్యాప్తంగా దీన్ని అందుబాటులోకి తీసుకురావాలన్న ఉద్దేశంతో అధికారులు ఈ అంశాన్ని ప్రయోగాత్మకంగా పరిశీలిస్తున్నారు. ఈ ప్రయోగం విజయవంతమైతే కనీసం నాల్గో వంతు మరణాలను తగ్గించవచ్చని పోలీసు అధికారులు భావిస్తున్నారు.

మరణాలను తగ్గించాలని...

రాష్ట్రంలో రోడ్డు ప్రమాదాల్లో మరణాల సంఖ్య పెరుగుతుండటం ఆందోళన రేకెత్తిస్తోంది. ఈ ఏడాది ఇప్పటి వరకు దాదాపు 15 వేల ప్రమాదాలు సంభవించగా అందులో 5,157 మంది మృత్యువాత పడ్డారు. 11,380 మంది గాయాలపాలయ్యారు. రోడ్డు ప్రమాదాల నివారణకు పోలీసులు ఇప్పటికే పలు చర్యలు చేపడుతున్నారు. అలాగే ప్రమాదాల్లో గాయపడ్డ వారికి సత్వర చికిత్స చేయించి మరణాలను తగ్గించాలని పోలీసులు నిర్ణయానికి వచ్చారు.

గోల్డెన్ అవర్...

ముఖ్యంగా ప్రమాదం జరిగిన తర్వాత మొదటి గంట ఎంతో విలువైంది. దీన్నే ‘గోల్డెన్‌ అవర్‌’గా పిలుస్తారు. ప్రమాద బాధితులకు ఈ సమయంలో మెరుగైన చికిత్స అందిస్తే వారి ప్రాణాలు కాపాడవచ్చు. ప్రమాదం జరిగిందన్న సమాచారం తెలియగానే సంఘటనా స్థలానికి చేరుకునే పోలీసులు అంబులెన్సుని పిలిపించి క్షతగాత్రులను సమీప ఆసుపత్రికి తరలిస్తుంటారు.

చాలా సందర్భాల్లో క్షతగాత్రులు ఆసుపత్రికి వెళ్లే సరికి అక్కడ అత్యవసర చికిత్సకు అవసరమైన ఏర్పాట్లు, సామగ్రి ఉండదు. కొన్ని ఆసుపత్రుల్లో వైద్యులూ అందుబాటులో ఉండరు. ఇలా.. ప్రమాద సమాచారం తెలుసుకోవడం, అంబులెన్సును పిలిపించడం, ఆసుపత్రికి తరలించడం, అక్కడ సరైన ఏర్పాట్లు, వైద్యులు ఉండకపోవడం లాంటి కారణాలతో ఆలస్యం జరిగి మొదటి గంట(గోల్డెన్‌ అవర్‌) వృథా అవుతుంది.

ఇది క్షతగాత్రుల ప్రాణాల మీదకు తెస్తోంది. దీన్ని దృష్టిలో ఉంచుకున్న పోలీసు అధికారులు ఈ జాప్యాన్ని నివారించి క్షతగాత్రులకు సత్వర చికిత్స అందిస్తూ వారి ప్రాణాలను కాపాడటానికి సాంకేతిక సాయం తీసుకోవాలని నిర్ణయించారు. ఆ కోణంలో చర్యలు చేపట్టారు.

* గోల్డెన్‌ అవర్‌లో క్షతగాత్రుల ప్రాణాలను కాపాడటంలో భాగంగా టీఎస్‌ కాప్‌ యాప్‌లో అదనపు ఫీచర్‌ను జోడించారు. ఇందులో ఆసుపత్రులు, అంబులెన్సులను జియోట్యాగింగ్‌ చేశారు.

* ప్రమాద సమాచారం తెలియగానే.. సంఘటనా స్థలానికి సమీపంలో ఉన్న అంబులెన్సులు, ఆసుపత్రుల వివరాలు టీఎస్‌ కాప్‌ యాప్‌లో కనిపిస్తాయి. దాని ప్రకారం దగ్గర్లో ఉన్న అంబులెన్సును వెంటనే పిలిపించడంతో పాటు సమీప ఆసుపత్రికి ఫోన్‌ చేసి ఒక్క నిమిషం కూడా ఆలస్యం జరగకుండా అత్యవసర చికిత్సకు అన్నీ సిద్ధం చేయాలని సూచిస్తారు.

* క్షతగాత్రులు ఆసుపత్రికి చేరుకోగానే వైద్యుల పర్యవేక్షణలో చికిత్స ప్రారంభిస్తారు.

* ప్రస్తుతం హైవే పెట్రోలింగ్‌ నిర్వహిస్తున్న 60 వాహనాలకు ఈ సదుపాయం కల్పిస్తున్నారు. క్రమంగా అన్ని వాహనాల్లోనూ ఈ సదుపాయాన్ని అందుబాటులోకి తెస్తామని ఓ ఉన్నతాధికారి వెల్లడించారు.

ఇదీ చూడండి: కాళేశ్వరం తాజా అంచనా కసరత్తు... త్వరలోనే స్పష్టత..!