హైదరాబాద్ జగద్గిరిగుట్ట పరిధిలో ముగ్గురు వ్యక్తులు స్విగ్గీ సంస్థకు ఫుడ్ ఆర్డర్ చేశారు. డెలివరీ బాయ్ సంబంధిత పార్శిల్ తెచ్చాక... నిందితులు మణిదీప్, వినయ్, వీరేష్లు అతనిపై దాడి చేశారు. బాధితుడి దగ్గరున్న సెల్ఫోన్, విలువైన వస్తువులు దోచుకున్నారు. ఇదే వృత్తిగా ఈ ముగ్గురూ తరచూ ఇలాంటి నేరాలకు పాల్పడుతుంటారు.
సెల్ఫోన్, విలువైన వస్తువుల దోపిడీ
ఈనెల 3న రాత్రి 10 గంటల సమయంలో ఫుడ్ కావాలని స్విగ్గీకి ఫోన్ చేయగా... డెలివరీ బాయ్ ఫుడ్తో జగద్గిరిగుట్ట వచ్చి మనిదీప్కు ఫోన్ చేశాడు. ఈ క్రమంలో ముగ్గురు నిందితులు డెలివరీ బాయ్ని రావి నారాయణ రెడ్డి నగర్ వద్దకు రమ్మని సూచించారు. ఘటనా స్థలానికి వచ్చిన బాధిత ఏజెంట్ని... సమీపంలోని నిర్జీవ ప్రదేశానికి తీసుకెళ్ళి అతని వద్ద ఉన్న సెల్ ఫోన్, విలువైన వస్తువులను దోచేశారు. బీర్ సీసాతో దాడికి యత్నించగా డెలివరీ బాయ్ అరుచుకుంటూ రోడ్డు వైపు పరుగులు తీశాడు.
నిందితులపై రౌడీ షీట్...
అరుపులు విన్న స్థానికులు బాధితుడ్ని కాపాడారు. అనంతరం ముగ్గురు నిందితులు అక్కడి నుండి పారిపోయారు. సమాచారం అందుకున్న జగద్గిరిగుట్ట పోలీసులు సంఘటన స్థలానికి చేరుకుని బాధితుడి సెల్ ఫోన్, కాల్ డేటా ఆధారంగా నిందితులను పట్టుకుని రిమాండ్కు తరలించారు. గతంలోనూ వీరిపై పలు పీఎస్ల్లో సెల్ ఫోన్, స్నాచింగ్, దారి దోపిడీ కేసులు ఉన్నాయి. వీరిపై రౌడీ షీట్ ఓపెన్ చేస్తామని బాలానగర్ ఏసీపీ పురుషోత్తమ్ స్పష్టం చేశారు.
ఇవీ చూడండి : పెద్దపులి కలకలం... కాపరి చూస్తుండగానే ఆవులమందపై దాడి
