కరోనా మహమ్మారి నగరాలు, పట్టణాలు, పలెల్లు అనే తేడా లేకుండా వ్యాప్తి చెందింది. చాలా మంది కొవిడ్ బారిన పడ్డారు. ఈ పరిస్థితుల్లో గర్భిణీలు, బాలింతలు, చిన్నారులకు పౌష్టికాహారం చాలా అవసరంకాగా.. అంగన్ వాడీ కేంద్రాలు మూతపడ్డాయి. పట్టణాల్లో అంతగా ఇబ్బంది లేకపోయినా.. పల్లెలు, ప్రత్యేకించి మారుమూల ప్రాంతాలైన ఏజెన్సీల్లో.. గర్భిణీలు, బాలింతలకు అంగన్ వాడీల సేవలు చాలా అవసరం. కరోనా ఉద్ధృతి వల్ల సహాయానికి ఆటంకం కలగకుండా ఇళ్లకే రేషన్‌ను చేరవేస్తోంది. రాష్ట్ర వ్యాప్తంగా 35వేల మంది అంగన్‌వాడీ కార్యకర్తలు లబ్ధిదారుల సరుకులను చేర్చే పనిలో నిమగ్నమయ్యారు. గుడ్లు, పాలు, నూనె, పప్పు, ఉప్పుతో పాటు బాలామృతాన్ని ఇళ్ల వద్దకే వెళ్లి పంపిణీ చేస్తున్నారు.
ఫీవర్ సర్వేలోనూ క్రియాశీలక పాత్ర పోషిస్తున్నారు
గర్భిణులను సమయానుసారం ఆస్పత్రులకు తీసుకెళ్లడం, ప్రసవాలు చేయించి ఇళ్లకు చేరుస్తూ అంగన్‌వాడీలు మన్ననలు పొందుతున్నారు. తల్లీబిడ్డల ఆరోగ్య పరిరక్షణకు చర్యలు చేపడుతున్నారు. ఫీవర్ సర్వేలోనూ క్రియాశీలక పాత్ర పోషిస్తున్నారు. ఆశా కార్యకర్తలు, ఏఎన్ఎంలతో కలిసి అంగన్ వాడీలు ఇంటింటికి వెళ్లి సర్వే చేస్తున్నారు. లక్షణాలు ఉన్న వారికి మెడికల్ కిట్లు అందిస్తూ బాధితుల ఆరోగ్యాన్ని ఎప్పటికప్పుడు పర్యవేక్షిస్తున్నారు.
రెండో డోసు తీసుకుని సేవలు
ప్రత్యేకించి మారుమూల ప్రాంతాల్లో అంగన్ వాడీ కార్యకర్తలు అద్భుతమైన సేవలు అందిస్తున్నారని అధికారులు ప్రశంసిస్తున్నారు. ప్రజల అభినందనలు అందుకుంటున్నారని కితాబిస్తున్నారు. కరోనా మొదటి వేవ్‌లో అద్భుత పనితీరు కనబర్చిన.. రాష్ట్రానికి చెందిన అంగన్ వాడీ కార్యకర్తలకు జాతీయ అవార్డులు దక్కాయని గుర్తుచేస్తున్నారు. కరోనా మహమ్మారిపై అంగన్ వాడీ కార్యకర్తలు ప్రజల్లో అవగాహన కల్పిస్తున్నారు. నియంత్రణ చర్యలతో పాటు టీకాల విషయంపైనా అప్రమత్తం చేస్తున్నారు. రాష్ట్ర వ్యాప్తంగా 70 శాతానికిపైగా అంగన్ వాడీలు కొవిడ్ టీకా రెండో డోసు తీసుకుని అలుపెరగని సేవలు అందిస్తున్నారు.
ఇదీ చదవండి: స్పుత్నిక్‌-వి వ్యాక్సినేషన్‌ మెగా ట్రయల్‌రన్
