విద్యారంగాన్ని రాష్ట్ర ప్రభుత్వం విస్మరించింది: ఏఐఎస్​ఎఫ్​

బడ్జెట్​లో విద్యారంగానికి తక్కువ కేటాయింపులు చేయడం ద్వారా రాష్ట్ర ప్రభుత్వం ప్రైవేటు విద్యకు రెడ్ కార్పెట్ పరుస్తోందని అఖిల భారత విద్యార్థి సమాఖ్య ఆరోపించింది. కొఠారి కమిషన్ సూచనలకు అనుగునంగా విద్యారంగానికి ప్రత్యేక నిధులు కేటాయించాలని డిమాండ్​ చేస్తూ.. హిమాయత్ నగర్​ కూడలి వద్ద సమాఖ్య సభ్యులు బడ్జెట్ పత్రులను దహనం చేశారు.

రాష్ట్ర ప్రభుత్వం విద్యారంగాన్ని పూర్తిగా విస్మరించిందని అఖిల భారత విద్యార్థి సమాఖ్య (ఏఐఎస్​ఎఫ్​) సభ్యులు ఆరోపించారు. బడ్జెట్​లో తక్కువగా కేటాయింపులు చేయడాన్ని నిరసిస్తూ.. హైదరాబాద్ జిల్లా కమిటీ ఆధ్వర్యంలో హిమాయత్ నగర్​ కూడలి వద్ద బడ్జెట్ పత్రులను దహనం చేశారు.

కేంద్ర ప్రభుత్వం 1964లో నియమించిన కొఠారి కమిషన్ బడ్జెట్​లో విద్యా రంగానికి 30 శాతం నిధులు కేటాయించాలని సూచించిందని ఏఐఎస్​ఎఫ్​ సభ్యులు తెలిపారు. గురువారం ప్రవేశపెట్టిన బడ్జెట్​లో కేవలం 5 శాతం నిధులను మాత్రమే కేటాయించడం ద్వారా రాష్ట్ర ప్రభుత్వం ప్రైవేటు విద్యకు రెడ్ కార్పెట్ పరుస్తోందని మండిపడ్డారు. ప్రభుత్వ విద్యకు తక్షణమే ప్రత్యేకమైన నిధులు కేటాయించి... రాష్ట్రంలోని యూనివర్సిటీలకు వైస్ ఛాన్స్​లర్లను నియమించాలని డిమాండ్​ చేశారు. ఉపాధ్యాయ ఖాళీలను వెంటనే భర్తీ చేయాలని కోరారు. లేనిపక్షంలో జిల్లా వ్యాప్తంగా పెద్ద ఎత్తున ఉద్యమాలు చేపడతామని ప్రభుత్వాన్ని హెచ్చరించారు.

ఇదీ చదవండి: జాతీయ ఉద్యోగ పరీక్షకు సిద్ధమేనా?