హైదరాబాద్ మహానగరం నుంచి విమాన ప్రయాణాలు ఊపందుకుంటున్నాయి. రాజధానిలోని జీఎంఆర్‌ అంతర్జాతీయ విమానాశ్రయం నుంచి జూన్‌లో ప్రయాణికుల సంఖ్యలో పెరుగుదల కనిపించింది. గత నెలలో 4 లక్షల మంది దేశీయ, 35 వేల మంది అంతర్జాతీయ ప్రయాణాలు సాగించారు. కరోనా రెండో దశకు ముందు నెలకు 10 లక్షల మంది రాకపోకలు సాగించేవారు. రెండో దశ సమయంలో ఆ సంఖ్య రెండు లక్షలకు పడిపోయింది. ప్రస్తుతం కేసులు సంఖ్య తగ్గుదలతో ప్రయాణికులు పెరుగుతున్నారు.
- ఈ ఏడాది జూన్‌ 1న పది వేల మంది ప్రయాణించగా, ఈ సంఖ్య 27వ తేదీకి 22 వేలకు చేరింది.
- హైదరాబాద్ నుంచి దిల్లీ, ముంబయి, బెంగళూరు, అహ్మదాబాద్‌, విశాఖపట్నానికి రాకపోకలు అధికంగా ఉన్నాయి. ఇందులో ముంబయికి వెళ్లే ప్రయాణికుల సంఖ్యను మే నెలతో పోల్చితే.. జూన్‌లో ఏకంగా 84 శాతం వృద్ధిరేటు కనిపించింది. ముంబయిలో కరోనా ఉద్ధృతి కారణంగా వాయిదా వేసుకున్న ప్రయాణాలను జూన్‌లో షెడ్యూల్‌ చేసుకున్నారు.
- ప్రయాణికులకు 72 గంటల ముందు ఆర్టీపీసీఆర్‌ పరీక్షలో నెగిటివ్‌ వస్తేనే.. కొన్ని రాష్ట్రాలు అనుమతిస్తున్నాయి. ఈ కారణంగా తోటి ప్రయాణికులతో ఇబ్బంది లేదన్న ఉద్దేశంతో విమానయానానికి ఆసక్తి చూపుతున్నారు.
- విమానాశ్రయం నుంచి గత నెల 1న వంద విమానాలు రాకపోకలు సాగించగా, 27వ తేదీకి ఈ సంఖ్య 199కి చేరింది. ఇదే సమయంలో రద్దీ లేని కారణంగా 13 నగరాలకు ఇంకా సర్వీసులు ప్రారంభం కాలేదు. కరోనా రెండో దశకు ముందు 55 నగరాలకు సర్వీసులు ఉండగా, ప్రస్తుతం 42 నగరాలకే పరిమితమయ్యాయి.
నిబంధనలు పాటించకపోతే జరిమానా..
విమానాశ్రయంలో కొవిడ్ మార్గదర్శకాలను పాటించని ప్రయాణికులు, సందర్శకులు, సిబ్బందికి జరిమానా విధించే అధికారం వీరికి ఉంటుంది. టెర్మినల్‌లో ప్రయాణికులు, సిబ్బంది మాస్కులు సరిగ్గా ధరించాలని, భౌతిక దూరాన్ని పాటించాలని కోరుతూ నిరంతరం ఇంగ్లీష్, తెలుగు, హిందీ భాషల్లో అనౌన్స్మెంట్ చేస్తున్నారు. కొవిడ్ విషయంలో తీసుకోవలసిన జాగ్రత్తలపై విమానాశ్రయంలోని వివిధ ప్రదేశాలలో సైనేజ్‌లను ప్రదర్శిస్తున్నారు.
రక్షణ కోసం ప్రత్యేక చర్యలు
ప్రయాణికులకు మార్గనిర్దేశం చేయడానికి పౌర విమానయాన మంత్రిత్వ శాఖ ఆదేశాల ప్రకారం కొవిడ్ జాగ్రత్తల సమాచారం వివిధ ప్రదేశాలలో ప్రదర్శిస్తున్నారు. కౌంటర్ల వద్ద రద్దీని నివారించడానికి, ప్రయాణికులు సెల్ఫ్-చెకిన్ సౌకర్యం, సెల్ఫ్-బ్యాగ్ ట్యాగ్ సౌకర్యం లాంటి సెల్ఫ్ సర్వీసులను ఉపయోగించుకోమని ప్రోత్సహిస్తున్నారు. విమానాశ్రయం ఫోర్‌కోర్ట్ ప్రాంతంలో, చెక్-ఇన్ హాల్స్‌లో భౌతిక దూర నిబంధనల ప్రకారం సెల్ఫ్-చెకిన్ కియోస్క్‌లను ఏర్పాటు చేసారు. టచ్-లెస్ టెక్నాలజీని కలిగిన ఈ కియోస్క్లు క్యూఆర్ (QR CODE) కోడ్ ద్వారా చెక్ఇన్ ప్రక్రియ పూర్తి చేయడానికి సహాయపడతాయని తెలిపారు. దేశీయ, అంతర్జాతీయ ప్రయాణికులందరికీ పేపర్‌లెస్ ఈ-బోర్డింగ్ సదుపాయం ఉన్న ఏకైక విమానాశ్రయం హైదరాబాద్ అని తెలిపారు.
ఇదీ చదవండి: Registration Department: వ్యవసాయ భూముల విలువల్లో భారీ మార్పులు
