చమురు ధరలపై కేంద్ర ప్రభుత్వం ఎక్సైజ్‌ సుంకం తగ్గించడంతో తెలంగాణలోనూ పెట్రోల్, డీజిల్‌ ధరలు తగ్గాయి. కేంద్ర ప్రభుత్వం పెట్రోల్‌పై రూ.5, డీజిల్‌పై రూ.10 చొప్పున ఎక్సైజ్‌ సుంకం తగ్గించింది. ఈ నేపథ్యంలో కేంద్ర ఎక్సైజ్‌ సుంకంపై రాష్ట్ర ప్రభుత్వం వ్యాట్ తగ్గించడంతో హైదరాబాద్‌లో పెట్రోల్‌పై రూ.6.33, డీజిల్‌పై 12.79 చొప్పున ఊరట కలిగింది. దీంతో గురువారం నగరంలో పెట్రోల్ లీటర్‌ ధర రూ.114.51 నుంచి రూ.108.18కి.. డీజిల్‌ రూ.107.40 నుంచి రూ.94.61కి తగ్గింది. ఈ ధరలు నేటి నుంచే అమల్లోకి వచ్చాయి.
రూ.7 చొప్పున తగ్గించిన ‘భాజపా’ రాష్ట్రాలు
చమురు ధరలను తగ్గిస్తూ కేంద్రం నిర్ణయం వెలువరించిన క్రమంలోనే దేశంలోని పలు భాజపా పాలిత రాష్ట్రాలు కూడా ఆ దిశగా అడుగులు వేశాయి. ఈ మేరకు పెట్రోలు, డీజిల్‌ ధరలపై పన్నులను స్వల్పంగా తగ్గించాయి. ఈ రెండు ఇంధనాలపై అసోం, మణిపుర్‌, త్రిపుర, గోవా రాష్ట్రాల్లో లీటరుకు రూ.7 చొప్పున తగ్గిస్తున్నట్టు ఆ రాష్ట్ర ప్రభుత్వాలు తెలిపాయి. ఫలితంగా కేంద్ర తగ్గింపుతో కలుపుకొంటే అక్కడ పెట్రోలు రూ.12, డీజిల్‌ రూ.17 మేర చవక కానున్నాయి.
ఇదీ చూడండి: కేంద్రం బాటలో పలు రాష్ట్రాలు- పెట్రో ధరలపై వ్యాట్ తగ్గింపు
