రాష్ట్ర పోలీస్ అకాడమీలో టెలిఫోన్ ఆపరేటర్గా పనిచేసే పిళ్లా వినయ కుమారి... హైదరాబాద్ రాంనగర్లోని గణేశ్ నగర్లో కుమార్తెతో కలిసి నివాసం ఉంటున్నారు. వినయ కుమారికి వరసకు కుమార్తె అయ్యే కుష్బూ తరచూ ఇంటికి వచ్చి పోయేది. తండ్రి, తమ్ముడు అనారోగ్యం పాలవడం వల్ల కుష్బూకు ఆర్థిక ఇబ్బందులు పెరిగాయి. వీటిని అధిగమించడానికి పెద్దమ్మ వినయ కుమారి ఇంట్లో దొంగతనానికి కుట్ర పన్నింది. దీనికోసం తన స్నేహితులు సూర్య, వంశీ సాయం తీసుకుంది. ఇంటికి సంబంధించిన దృశ్యాలు, పడకగదిలో ఉండే అల్మరాల దృశ్యాలు చరవాణిలో చిత్రీకరించి వాట్సాప్లో స్నేహితులకు పంపింది. ఈ నెల 19న వినయకుమారి ఇంటికి వెళ్లిన కుష్బూ.... నిమ్మరసంలో నిద్రమాత్రలు కలిపి వినయకుమారికి, ఆమె కుమార్తె కీర్తికి ఇచ్చింది. కీర్తి ఓ గంటలో నిద్రలేచింది. వినయకుమారి అపస్మారక స్థితిలో ఉండటం వల్ల కీర్తి ఆందోళనకు గురై ఆస్పత్రికి తీసుకెళ్లింది. అక్కడే ఉన్న కుష్బూ ఏమీ తెలీనట్లు వారితో పాటు ఆస్పత్రికి వెళ్లినట్లు పోలీసులు తెలిపారు.
అదే రోజు రాత్రి కీర్తి బ్యాగులోంచి ఇంటి తాళాలు తీసుకున్న కుష్బూ.. సూర్యకు అందజేసింది. సూర్య, వంశీ కలిసి వినయ కుమారి ఇంటికి వెళ్లారు. నేరుగా పడకగదిలోని బీరువాలో ఉన్న బంగారం, నగదు తీసుకెళ్లారు. తిరిగి ఇంటికి యథావిధిగా తాళం వేసి... తాళం చెవిని కుష్బూకు అప్పజెప్పారు. కుష్బూ తాళం చెవిని కీర్తి బ్యాగులో పెట్టింది. ఈ నెల 23న వినయ కుమారి ఆస్పత్రి నుంచి డిశ్చార్జ్ అయింది. ఇంటికి వచ్చిన వినయకుమారి, కీర్తి.. బీరువాలో ఉన్న బంగారం, నగదు కనిపించకపోయే సరికి పోలీసులకు ఫిర్యాదు చేశారు. కేసు నమోదు చేసుకొని దర్యాప్తు చేపట్టిన పోలీసులు కుష్బూపై అనుమానంతో ప్రశ్నించగా అసలు విషయం బయటపడింది. ఆమెతో పాటు ఆమెకు సహకరించిన సూర్య, వంశీని అరెస్ట్ చేశారు. వారివద్ద నుంచి 53.8 తులాల బంగారం, రూ.5 లక్షల 25 వేల నగదు స్వాధీనం చేసుకున్నారు.
ఇతరులతో సాన్నిహిత్యంగా మెలిగేటప్పుడు... తగిన జాగ్రత్తలు తీసుకోవాలని సీపీ అంజనీ కుమార్ సూచించారు. ఏదైనా సంఘటన చోటు చేసుకుంటే వెంటనే పోలీసులకు సమాచారమివ్వాలన్నారు. దీనివల్ల ఆధారాలు సేకరించడం, నిందితులను వెంటనే పట్టుకునే అవకాశం ఉంటుందని సీపీ అంజనీ కుమార్ తెలిపారు.
ఇదీ చూడండి : యువతి అదృశ్యం.. పక్కింటి యువకుడిపై అనుమానం
