అనధికార ప్లాట్లు, అక్రమ లేఅవుట్‌ల క్రమబద్ధీకరణ(ఎల్ఆర్ఎస్)కు దరఖాస్తు చేసుకున్న లక్షల మంది.. ఈ ప్రక్రియ ముందుకు సాగకపోవడంతో ఆందోళన చెందుతున్నారు. గ్రామీణ ప్రాంతాల్లో పది లక్షల మందికి పైగా, పట్టణ ప్రాంతాల్లో మరో పది లక్షల మంది.. నగర పాలక సంస్థల పరిధిలో నాలుగు లక్షల మందికిపైగా దరఖాస్తుదారులు ఉన్నారు. ఎల్ఆర్ఎస్ కానిదే ఆ ప్లాట్ల రిజిస్ట్రేషన్లు, క్రయ విక్రయాలకు అవకాశం లేదు. అవసరాలకు ప్లాట్లను అమ్ముకోలేరు. ఇళ్లను నిర్మించుకునేందుకు భవననిర్మాణ అనుమతులు రావు.
నెలన్నర కావొస్తున్నా...
ప్రణాళికాబద్ధమైన అభివృద్ధి లక్ష్యంగా నగరాలు, పట్టణాలు, గ్రామీణ ప్రాంతాల్లో ఎల్‌ఆర్‌ఎస్‌కు అవకాశం కల్పిస్తున్నట్లు ప్రభుత్వం పేర్కొంది. మొత్తం 25.59 లక్షల మంది దరఖాస్తు చేసుకున్నారు. ఇది ముగిసి నెలన్నర కావస్తున్నా వీటి పరిష్కార ప్రక్రియ మాత్రం ఇంకా ప్రారంభం కాలేదు. దరఖాస్తు చేసుకున్నవారిలో అత్యధికులు మధ్యతరగతి వారే ఉన్నారని ప్రాథమిక అంచనా. పట్టణీకరణ నేపథ్యంలో నగరాల్లోనే కాకుండా పట్టణాలు, మండల కేంద్రాలు, గ్రామీణ ప్రాంతాల్లో కూడా వేల సంఖ్యలో లేఅవుట్‌లు వచ్చాయి. క్రమబద్ధీకరణకు అవకాశం ఉంటుందనే విశ్వాసంతో లక్షల మంది ఎల్ఆర్ఎస్ లేకున్నా ప్లాట్లను కొనుగోలు చేశారు.
ఇరుక్కుపోయిన కుటుంబాలు
ప్రస్తుతం ఎల్ఆర్ఎస్ లేని ప్లాట్ల రిజిస్ట్రేషన్లను ప్రభుత్వం నిలిపివేసింది. అది ఉంటేనే టీపీఐఎన్‌ ఇచ్చేలా ప్రభుత్వం ఆదేశాలు జారీ చేసింది. టీపీఐఎన్‌ లేనిదే రిజిస్ట్రేషన్లు జరగవు. ఈ చట్రంలో ఇరుక్కుపోయిన కుటుంబాల్లో పెళ్లిళ్ల వంటి కార్యక్రమాలు వాయిదా పడుతున్నాయి. ప్లాట్లు అమ్మి పిల్లల్ని పెద్ద చదువులకు పంపాలనే ప్రయత్నాలకు కూడా ఆటంకాలు ఎదురవుతున్నాయి.
జరగాల్సిన ప్రక్రియ
లేఅవుట్‌లవారీగా ఎల్ఆర్ఎస్ దరఖాస్తుల గ్రూపింగ్‌, క్లస్టరింగ్‌ చేపట్టాలి. వాస్తవాల నిర్ధారణకు క్షేత్రస్థాయి పరిశీలన చేయాలి. నిబంధనల మేరకు ఉంటే ఎల్ఆర్ఎస్ కోసం నిర్దేశించిన మొత్తాన్ని ఆన్‌లైన్‌ ద్వారా చెల్లించాలని దరఖాస్తుదారుకు సమాచారం పంపాలి. చెల్లించిన తర్వాత పురపాలక సంఘాల్లో కమిషనర్లు క్రమబద్ధీకరణ పూర్తి చేయాలి. గ్రామపంచాయతీల్లో క్రమబద్ధీకరణ ప్రక్రియను కలెక్టర్‌ లేదా అదనపు కలెక్టర్‌ పూర్తి చేస్తారు.
ఇదీ చూడండి : కళ్లెదుటే కొనఊపిరితో కుమారుడు.. ఫలించని తల్లి ప్రయత్నం
