స్టాక్​ మార్కెట్​లో పెట్టుబడుల పేరుతో 'కోట్లు' దోచేశారు!

స్టాక్​ మార్కెట్​లో పెట్టుబడుల పేరుతో పలువురిని మోసం చేసిన ఇద్దరిని పోలీసులు అరెస్టు చేశారు. మహారాష్ట్రకు చెందిన ఫియాజ్​, హమీద్​, జహంగీర్​లు 100 మంది నుంచి 10 కోట్ల వరకు డిపాజిట్లు చేయించుకున్నట్లు పోలీసులు పేర్కొన్నారు.

స్టాక్ మార్కెట్​లో పెట్టుబడుల పేరుతో పలువురిని మోసం చేసిన కేసులో సీసీస్, సైబర్ క్రైం పోలీసులు ఇద్దరిని అరెస్ట్ చేశారు. మహారాష్ట్రకు చెందిన ఫియాజ్ మొహమ్మద్ అన్సారీ, హమీద్, మొహమ్మద్ జహంగీర్​లు అన్సారీ క్యాపిటల్ సొల్యూషన్, అన్సారీ పెర్ఫ్యూమ్స్ అండ్ కాస్మొటిక్స్ పేరుతో స్టాక్ ఎక్చెంజ్​ సంస్థలను స్థాపించారు. తమ సంస్థలో పెట్టుబడులు పెడితే అధిక లాభాలు వస్తాయంటూ ప్రజలను నమ్మించారు.

మహారాష్ట్ర బివండిలో అరెస్టు:

హైదరాబాద్​ చాంద్రాయణగుట్టకు చెందిన మొహమ్మద్ జీలనీ షరీఫ్ వారి సంస్థలో లక్షల్లో పెట్టుబడి పెట్టాడు. ఆ డబ్బుకు సంబంధించి ఎటువంటి లావాదేవీలు జరగకపోవడం, వారి నుంచి ఎటువంటి సమాధానం రాకపోవడం వల్ల మోసపోయానని గ్రహించిన జీలనీ గతేడాది సెప్టెంబర్​లో సీసీస్ సైబర్ క్రైం పోలీసులకు ఫిర్యాదు చేశాడు. ఏడాది కాలంగా తప్పించుకు తిరుగుతున్న ఫియాజ్, హమీద్​లను ఆదివారం మహారాష్ట్రలోని బివండిలో అదుపులోకి తీసుకున్నారు.

100 మంది నుంచి 10 కోట్లు:

వారిని విచారించగా 100 మంది నుంచి 10 కోట్ల వరకు డిపాజిట్లు చేయించుకున్నట్లు వెల్లడించారు. మరో నిందితుడు మొహమ్మద్ జహంగీర్ పరారీలో ఉన్నాడని... అరెస్ట్ చేసిన ఇద్దరిని మేజిస్ట్రేట్ ముందు హాజరుపరిచి రిమాండ్​కు తరలించినట్లు తెలిపారు.

ఇవీ చూడండి: విషాదం.. నీటికుంటలో పడి ముగ్గురు చిన్నారులు మృతి