కాంగ్రెస్​ అభ్యర్థుల ఎంపికలో తర్జనభర్జనలు

లోక్​సభ అభ్యర్థుల ఎంపికపై కాంగ్రెస్​ వ్యవహారాల బాధ్యులు కుంతియా, సీఎల్పీ నేత భట్టి, పీసీసీ అధ్యక్షుడు ఉత్తమ్​ బుధవారం సమావేశమయ్యారు. మరింత బలమైన అభ్యర్థులను సూచించాలని ఏఐసీసీ కోరడంతో అభ్యర్థుల ఎంపికలో కొత్త పేర్లు తెరపైకి వచ్చాయి.

లోక్​సభ ఎన్నికల్లో గెలుపే లక్ష్యంగా కాంగ్రెస్​ కసరత్తు చేస్తోంది. రాష్ట్ర నాయకత్వం జాబితాను అధిష్ఠానికి అందించింది. అయితే మరింత బలమున్న వారిని ఎంపిక చేయాలని ఏఐసీసీ కోరడంతో బుధవారం సమావేశమైన కుంతియా, భట్టి, ఉత్తమ్​ కొత్త పేర్లను తెరపైకితీసుకొచ్చారు.

తెరపైకి సీతక్క

మల్కాజిగిరి నుంచి రేవంత్​ రెడ్డిని బరిలోకి దింపాలని యోచిస్తున్నట్లు తెలుస్తోంది. ఈ అంశంపై చర్చించేందుకు రేవంత్​ దిల్లీ వెళ్లారు. మహబూబాబాద్​ స్థానానికి ఇప్పటికే బలరాం నాయక్​, బెల్లయ్య నాయక్​, రాములు నాయక్​లను పరిశీలించిన కమిటీ తాజాగా ములుగు ఎమ్మెల్యే సీతక్కను తెరపైకి తీసుకొచ్చింది. ఆదిలాబాద్​ స్థానాన్ని లంబాడాలకు కేటాయించి...మహబూబాబాద్​ను కోయ సామాజిక వర్గమైన సీతక్కకు ఇవ్వాలని నిర్ణయించినట్టు తెలుస్తోంది.

మంత్రి ఎ. చంద్రశేఖర్

పెద్దపల్లి నియోజకవర్గానికి గోమాస శ్రీనివాస్​, కవ్వంపల్లి సత్యనారాయణతో పాటు తాజాగా మాజీ మంత్రి ఎ.చంద్రశేఖర్​ పేరు వినిపిస్తోంది. నల్గొండకు సంబంధించి పటేల్​ రమేశ్​ రెడ్డి, కోమటిరెడ్డి వెంకటరెడ్డిల్లో ఎవరికివ్వాలో తేల్చుకోలేకపోతున్నారు. భువనగిరి నుంచి మధుయాష్కీగౌడ్​ ఖరారైనట్టు సమాచారం. నిజామాబాద్​కు ఎన్​ఆర్​ఐ తిరుపతి రెడ్డి పేరు పరిశీలిస్తున్నారు.

తెరాస జాబితా తర్వాతే

ఖమ్మం, మహబూబ్​నగర్​ ఎంపీలు పొంగులేటి, జితేందర్​ రెడ్డిలకు తెరాస టికెట్​ నిరాకరిస్తుందన్న ప్రచారంతో ఆ స్థానాల్లో వేచి చూడాలని హస్తం​ భావిస్తోంది. వారు పార్టీలోకి వస్తే ఆయా స్థానాలకు అభ్యర్థులుగా ప్రకటించే అవకాశం ఉంది.