స్థానిక ఎన్నికలను తెలంగాణ కాంగ్రెస్ ప్రతిష్ఠాత్మకంగా తీసుకుంది. పార్లమెంటు ఎన్నికల్లో అనుకూల ఫలితాలు వస్తాయని అంచనా వేస్తున్న హస్తం పార్టీ... స్థానిక సంస్థల్లో అత్యధిక స్థానాలు కైవసం చేసుకునేందుకు వ్యూహరచన చేస్తోంది. ఇప్పటికే ఎంపీటీసీ అభ్యర్థుల ఎంపికను మండల అధ్యక్షులకు అప్పగించింది. జిల్లా పరిషత్ ఛైర్మన్ అభ్యర్థుల ఎంపిక, వ్యూహరచనకు ముఖ్య నాయకులతో నేడు సమావేశం ఏర్పాటు చేశారు.
నేడు ప్రత్యేక సమావేశం
ఈ నెల 20లోపు ఎన్నికల షెడ్యూలు వచ్చే అవకాశం ఉన్నందున హస్తం పార్టీ అప్రమత్తమైంది. డీసీసీ అధ్యక్షులతో సంప్రదించి జిల్లాల వారీగా వివరాలు సేకరిస్తోంది. 32 జిల్లాలకు సమన్వయకర్తలను నియమించి ఎన్నికల బాధ్యతలు అప్పగించింది. పార్టీ అనుసరించాల్సిన విధివిధానాలపై ఈ రోజు సాయంత్రం 4 గంటలకు గాంధీభవన్లో ప్రత్యేకంగా సమావేశం కానున్నారు. ఈ భేటీలో ఆర్సీ కుంతియా, ఉత్తమ్, భట్టి, కార్యనిర్వాహక అధ్యక్షులు, పీసీసీ ఉపాధ్యక్షులు, డీసీసీ అధ్యక్షులు, సమన్వయకర్తలు పాల్గొననున్నారు.
పకడ్బందీగా ఎంపిక
ఎంపీటీసీ, జడ్పీటీసీ అభ్యర్థుల ఎంపికపై క్షేత్రస్థాయిలో కసరత్తు చేస్తున్నారు. ప్రజాదరణతో పాటు పార్టీ విధేయత ప్రాతిపదికన ఎంపిక చేయాలని డీసీసీలను ఉత్తమ్ ఆదేశించారు. పార్టీ బలోపేతం కోసం యువతకు ప్రాధాన్యత ఇవ్వాలని నిర్ణయించారు. అందుకు అనుగుణంగా ప్రణాళికలు సిద్ధం చేస్తున్నారు. ఈ నెల 18వరకు డీసీసీలు తుది జాబితా ఖరారు చేసి 19న పీసీసీకి పంపనున్నారు. స్థానిక సంస్థల ఎన్నికల వ్యవహారమంతా జిల్లా కమిటీలు, సమన్వయకర్తలకే అప్పగించింది. జడ్పీ ఛైర్మన్ అభ్యర్థుల ఎంపిక మాత్రమే పీసీసీ స్థాయిలో చేయనున్నారు. సాధ్యమైనంత వరకు సామాజిక సమానత్వాన్ని పాటించి, బలమైన అభ్యర్థులను బరిలో దింపి అధిక స్థానాలు దక్కించుకోవాలని హస్తం భావిస్తోంది.
ఇవీ చూడండి: రాష్ట్ర కాంగ్రెస్ నాయకత్వంపై సీనియర్ల అసంతృప్తి
