సరైన పరిహారం ఇస్తేనే భూములిస్తాం.. జెన్​కో రైల్వే లైన్​పై రైతుల ఆందోళన

భద్రాద్రి కొత్తగూడెం జిల్లా మణుగూరు మండలం రామానుజవరంలో ఉద్రిక్తత చోటుచేసుకుంది. జెన్​కో సంస్థ ఏర్పాటు చేస్తున్న రైలు మార్గపు పనులను రైతులు అడ్డుకుని ఆందోళన చేపట్టారు. తమకు న్యాయమైన పరిహారం ఇచ్చాకే పనులు చేపట్టాలని డిమాండ్​ చేశారు.

భద్రాద్రి కొత్తగూడెం జిల్లా మణుగూరు మండలం రామానుజవరంలో రైతులు ఆందోళన నిర్వహించారు. మణుగూరు నుంచి భద్రాద్రి థర్మల్ పవర్ ప్లాంటుకు బొగ్గు రవాణా చేసేందుకు జెన్​కో సంస్థ ఏర్పాటు చేస్తున్న రైలు మార్గపు పనులను రైతులు అడ్డుకున్నారు. రైలు మార్గానికి రెవెన్యూ శాఖ చేపట్టిన భూసేకరణలో భాగంగా ప్రభుత్వం చెల్లించే నగదు తమకు సరిపోదని.. భూములు ఇచ్చేందుకు రైతులు నిరాకరించారు. తమకు న్యాయమైన పరిహారం, ఆర్​అండ్​ఆర్ ప్యాకేజీ చెల్లించాలని డిమాండ్​ చేశారు.

పనులు ఆపేసి ఆందోళన చేసిన రైతులకు పోలీసులు నచ్చజెప్పే ప్రయత్నం చేశారు. పనులు జరిగేందుకు సహకరించాలని కోరారు. తాము కోరిన విధంగా పరిహారం చెల్లించిన తర్వాతే పనులు చేపట్టాలని రైతులు భీష్మించుకుని కూర్చున్నారు. చేసేదేమీలేక రైతులను పోలీసులు అరెస్టు చేసేందుకు యత్నించగా.. ఉద్రిక్త వాతావరణం చోటుచేసుకుంది. పోలీసులు, రైతులకు మధ్య పరస్పర తోపులాట జరిగింది. ఈ క్రమంలో ముగ్గురు రైతులకు గాయాలయ్యాయి. వెంటనే వారిని ఆస్పత్రికి తరలించారు.

రైతులు చేస్తున్న ఆందోళనకు కాంగ్రెస్ నాయకులు మద్దతు పలికారు. అరెస్ట్ చేసిన వారిని వాహనాల్లో తరలించకుండా పోలీసులకు అడ్డుపడ్డారు. పోలీసులకు వ్యతిరేకంగా నినాదాలు చేశారు. ఆందోళనకు దిగిన కాంగ్రెస్ నాయకులను కూడా.. పోలీసులు అరెస్టు చేశారు.

ఇదీ చూడండి: