మొక్కలు నాటండి- సకల జీవరాశిని రక్షించండి అంటూ సందేశమిస్తున్నారు వనజీవి రామయ్య దంపతులు. ఎక్కడ మొక్కలు నాటే కార్యక్రమం జరిగినా ముందుండి స్ఫూర్తిగా నిలుస్తున్నారు. భద్రాద్రి కొత్తగూడెం జిల్లా భద్రాచలంలో జేడీ ఫౌండేషన్, ఛాంబర్ ఆఫ్ కామర్స్ ఆధ్వర్యంలో ఏర్పాటు చేసిన స్వచ్ఛభారత్ కార్యక్రమానికి ముఖ్యఅతిథిగా హాజరయ్యారు. ఆస్పత్రి ప్రాంగణంలో మొక్కలు నాటారు.
పట్టణంలోని అంబేద్కర్ సెంటర్లో ఉన్న ఆస్పత్రిలో మొక్కను పరిశీలించారు. దాదాపు ఆరు సంవత్సరాల వయస్సు గల మొక్కను ఒక చోట నుంచి తీసి మరోచోట నాటి బతికించిన పట్టణానికి చెందిన శంకర్ను వనజీవి రామయ్య సన్మానించారు. మొక్కను తప్పనిసరి పరిస్థితుల్లో తీసేయాల్సి వస్తే మొక్కను నరకకుండా వేరే ప్రదేశంలో నాటడం మంచి కార్యక్రమమని అన్నారు. ప్రతి ఒక్కరూ మొక్కలు నాటి పర్యావరణ పరిరక్షణకు దోహదపడాలని సూచించారు. ఈ కార్యక్రమంలో పట్టణ ప్రముఖులు శంకర్, కంభంపాటి సురేశ్, గోళ్ల భూపతి రావు, దేశప్ప తదితరులు పాల్గొన్నారు.
