రాష్ట్రవ్యాప్తంగా సెప్టెంబర్ 1న ఆన్లైన్ తరగతులు ప్రారంభం కానున్న నేపథ్యంలో భద్రాద్రి కొత్తగూడెం జిల్లా మారుమూల ప్రాంతాల్లో ఇంటర్నెట్ సౌకర్యం లేని విద్యార్థులకు ప్రత్యేక ప్రణాళికలు రూపొందించాలని జిల్లా కలెక్టర్ ఎంవీ రెడ్డి విద్యాశాఖ అధికారులను ఆదేశించారు. కలెక్టర్ క్యాంపు కార్యాలయం నుంచి ఆయన టెలీ కాన్ఫరెన్స్ ద్వారా విద్యాశాఖ అధికారులతో మాట్లాడారు. ప్రతీ విద్యార్థి ఆన్లైన్ తరగతులకు హాజరయ్యేలా చూడాలని, తరగతులకు హాజరయ్యే విద్యార్థుల వివరాలతో మ్యాపింగ్ చేయాలని, ప్రతిరోజు హాజరు శాతాన్ని తనకు పంపాలని కలెక్టర్ ఆదేశించారు.
సెప్టెంబరు 2న జరగనున్న ‘పాలీసెట్‌’ నిర్వహణకు అన్ని ఏర్పాట్లు చేయాలని కలెక్టర్ సంబంధిత అధికారులను ఆదేశించారు. కొత్తగూడెం 8, భద్రాచలంలో 5 పరీక్షా కేంద్రాలను ఎంపిక చేసినట్లు ఆయన తెలిపారు. ఉదయం 11 గంటల నుంచి మధ్యాహ్నం 1.30 గంటల మధ్య పరీక్ష జరుగుతుందని, ప్రతి పరీక్షా కేంద్రానికి ఓ అధికారిని, తహశీల్దార్లు, ఎస్సైలు, ఎంఈవోలను ఫ్లైయింగ్‌ స్క్వాడ్‌లుగా నియమించామన్నారు. పరీక్షా కేంద్రాల్లో కొవిడ్‌ నివారణ చర్యలు చేపట్టాలని, పరీక్షకు హాజరయ్యే విద్యార్థుల కోసం ఆర్టీసీ అధికారులు బస్సులు నడపాలని కలెక్టర్ ఆదేశించారు.
ఇదీ చూడండి : ఆర్థిక ఇబ్బందులు తాళలేక బిడ్డను అమ్ముకున్న తల్లి
