Balloon theater run by women groups in asifabad: కొన్ని సంవత్సరాలుగా వారి ఊర్లో థియేటర్ లేక స్థానికులు ఇబ్బందులు పడుతున్నారు. వారికి నచ్చిన మూవీను హాల్లో చూడాలంటే దూర ప్రాంతాలకు వెళ్లవల్సి వచ్చేది. ఈ సమస్యను మహిళా సంఘాలు కలిసి కట్టుగా పోరాడి దూరం చేశాయి. చివరికి వారే ఒక సినిమా హాల్ని నిర్మించుకున్నారు. మొదటి సంవత్సరమే వారు అనుకున్నంత సంపాదన రావడంతో ఆనందంగా ఉన్నారు. ఇదంతా అసిఫాబాద్ జిల్లాలో జరిగింది.
కుమురంభీం జిల్లా వాసులు మూడు దశాబ్దాలుగా దూరమైన సినిమా కలను సాకారం చేశారు మహిళలు. పైసా పైసా కూడబెట్టిన పొదుపు డబ్బుతో, అధికారుల సహకారంతో, అత్యాధునిక థియేటర్ను అన్ని తామై విజయవంతంగా నడిపిస్తున్నారు. దేశంలోనే ఎక్కడ లేనివిధంగా మహిళా సంఘాల ఆధ్వర్యంలో కొనసాగుతున్న ఈ బెలూన్ థియేటర్ నేడు లాభాల బాటలో దూసుకుపోతుంది. 2022 మార్చి 8న కుమురం భీం జిల్లా సమాఖ్య ఆధ్వర్యంలో బెలూన్ థియేటర్ అసిఫాబాద్లో ప్రారంభమైంది.
పిక్చర్ ట్యూబ్ సంస్థ 50 శాతం 25 లక్షలు, మహిళ సంఘాలు 50 శాతం 25 లక్షలు పెట్టుబడి పెట్టారు. అధికారులు స్థలం సమకూర్చారు. 120 సీట్ల సామర్థ్యం ఉన్న ఈ థియేటర్ హెచ్డీ ప్రొడక్షన్తో పాటు, 5.2 డాల్బీ డిజిటల్ సౌండ్, కుషన్ సీట్లు ఉన్నాయి. ప్రమాదాలను తట్టుకునే విధంగా ఆధునిక సాంకేతిక పరిజ్ఞానంతో నిర్మించారు. ఆర్ఆర్ఆర్ సినిమా నడిచే సమయంలో దర్శకుడు రాజమౌళి థియేటర్ను సందర్శించి మహిళల నిర్వహణను అభినందించారు.
టిక్కెట్లు ఇవ్వడం, ప్రొజెక్టర్ నడిపించడం, శాటిలైట్ సంకేతాల ద్వారా సినిమాను డౌన్లోడ్ చేయడం, చిరు దుకాణాలను నిర్వహించడం అన్ని మహిళ సంఘాల సభ్యులే చేస్తున్నారు. సంవత్సర కాలంగా 10 లక్షల ఆదాయం వచ్చింది. వీటిని మారుమూల గ్రామాల్లో ఉన్న మహిళ సంఘాలకు రుణాలుగా ఇస్తూ వారి ఉపాధికి చేయూత అందిస్తున్నారు.
"గత 30 సంవత్సరాలుగా అసిఫాబాద్లో సినిమా థియేటర్ లేదు. సినిమా చూడాలంటే దూర ప్రాంతాలకి వెళ్లవల్సి వచ్చేది. ఈ సినిమా హాల్ని ఏర్పాటు చేయడం మాకెంతో సంతోషాన్ని ఇస్తుంది. ఈ థియేటర్కి దర్శకుడు రాజమౌళి సందర్శించారు. చాలా మంది అధికారులు కూడా వచ్చారు." - మహిళ
ఇవీ చదవండి:
