ఆదిలాబాద్ జిల్లా జైనథ్ గ్రామానికి చెందిన నలుగురు విద్యార్థుల అదృశ్యం కలకలం రేపుతోంది. జిల్లా పరిషత్ సెకండరీ పాఠశాలలో 8వ తరగతి చదువుతున్న ప్రభాస్, రాజశేఖర్, అమూల్, చంద్రశేఖర్లు కనిపించకుండా పోయారు. బుధవారం సాయంత్రం స్నేహితుడి జన్మదిన వేడుకలకు వెళ్తున్నట్లు చెప్పి ఇంటి నుంచి బయటకు వెళ్లారు. రాత్రైనా ఇంటికి చేరుకోకపోవడం వల్ల ఆందోళన చెందిన తల్లిదండ్రులు గాలింపు చర్యలు చేపట్టారు.
ఆచూకీ తెలియదు... సర్వత్రా ఆందోళన.
ఈ క్రమంలో గురువారం ఉదయం విద్యార్థులు హైదరాబాద్లో ఉన్నట్లు జైనథ్లోని మిత్రుడికి ప్రభాస్ ఫోన్ చేసి చెప్పాడు. విషయాన్ని సదరు చిన్నారి కుటుంబీకులకు తెలపడం వల్ల వారు స్థానిక ఠాణాలో ఫిర్యాదు చేశారు. పోలీసులతో కలిసి తల్లిదండ్రులు హుటాహుటిన హైదరాబాద్కు బయలుదేరారు. రెండు రోజులుగా పోలీసులు, కుటుంబీకులు చర్యలు చేపడుతున్నా... విద్యార్థుల ఆచూకీ లభించకపోవడం వల్ల సర్వత్రా ఆందోళన వ్యక్తమవుతోంది.
ఇవీ చూడండి : ఘట్కేసర్లో ఓ వివాహిత అదృశ్యం
